ការប្រើប្រាស់បច្ចេកវិទ្យា VR ជួយដល់សុខភាពផ្លូវចិត្ត

ការប្រើប្រាស់បច្ចេកវិទ្យា ពិតជាមានសារៈសំខាន់ សម្រាប់សេវាសុខាភិបាល ក្នុងនោះ មានបច្ចេកវិទ្យា Virtual Reality (VR) ផងដែរ។ អ្នកផ្ដល់សេវាសុខាភិបាល មានជំនឿលើការប្រើប្រាស់បច្ចេកវិទ្យា VR ក្នុងការជួយដល់អ្នកជំងឺផ្លូវចិត្តមួយចំនួន រួមមាន ជំងឺស្ត្រេសក្រោយការប៉ះទង្គិចផ្លូវចិត្ត (PTSD) និងជំងឺថប់បារម្ភ ជាដើម។ល។

ការសិក្សាក្នុងឆ្នាំ១៩៩៥ បានរកឃើញថា ការប្រើប្រាស់បច្ចេកវិទ្យា VR អាចជួយឲ្យមនុស្សមួយចំនួន កាត់បន្ថយភាពភ័យខ្លាច​នៅ​ទីកន្លែងខ្ពស់។ ក្នុងការសិក្សានោះ គេឃើញថា ដោយប្រើ VR នៅទីតាំងខ្ពស់ មនុស្សមានអាការៈថប់បារម្ភទាបជាងមុន និងអាចជម្នះការគេចវេសពីទីតាំងខ្ពស់។

បច្ចេកវិទ្យា VR គឺជាបច្ចេកវិទ្យា ដែលអ្នកផ្ដល់សេវាសុខភាព អាចគ្រប់គ្រងបានពេញលេញ និងបង្ហាញរូបភាព ដែលខ្លួនចង់បង្ហាញ។ Virtual Reality គឺជារូបភាពបរិយាកាស ឬមជ្ឈដ្ឋានជុំវិញខ្លួន ជាលក្ខណៈ 3D ដែលមនុស្សអាចមើលឃើញ ដោយពាក់នូវឧបករណ៍ VR ហើយមនុស្សអាចធ្វើអន្តរកម្មបាន ជាមួយបរិយាកាសនោះបាន។ អន្តរកម្មនេះ ជាអន្តរកម្មសិប្បនិម្មិត ដែលបង្រៀនឱ្យអ្នកជំងឺប្រឈមនឹងស្ថានភាពតានតឹង​ ឬភាពភ័យខ្លាចរបស់ខ្លួន។

ក្នុងការព្យាបាលបញ្ហាផ្លូវចិត្ត VR មាននាទីស្រដៀងនឹងថ្នាំវេជ្ជសាស្ត្រ ដែលគ្រូពេទ្យផ្ដល់ក្នុងការព្យាបាលអ្នកជំងឺដែរ។ បច្ចេកវិទ្យា VR ផ្ដល់នូវជម្រើស Prescription ច្រើន សម្រាប់អ្នកជំងឺក្នុងការជ្រើសរើស វេទិកា បទពិសោធន៍ និងវិធីប្រើប្រាស់ផ្សេងៗ ដែលសមស្របទៅតាម​ស្ថានភាព និងភាពដែលអាចទទួលយកបាន​របស់អ្នកជំងឺ។

គួរបញ្ជាក់ថា ការប្រើប្រាស់បច្ចេកវិទ្យា VR ក្នុងវិធីព្យាបាលនេះ អាចបង្កឲ្យអ្នកជំងឺមួយចំនួន ជួបអាការៈក្អួតចង្អោរ។ ទន្ទឹមនឹងនេះ ព័ត៌មានរបស់អ្នកជំងឺ ក៏ត្រូវបានគេកត់ត្រាទុក ដូចនេះ ការរក្សាឯកជនភាពរបស់អ្នកជំងឺ គឺជារឿងសំខាន់ និងគួរមានការរក្សា និងព្រមព្រៀង​ឲ្យបានល្អ។

ក្រៅពីនេះ ការប្រើប្រាស់បច្ចេកវិទ្យា VR នៅមានកម្រិតទាបនៅឡើយ។ អ្នកស្រាវជ្រាវជឿថា ភាពច្នៃប្រឌិត និងការលូតលាស់នៃបច្ចេកវិទ្យា អាចជួយឲ្យវិធីព្យាបាលនេះ រីកចម្រើន កាន់តែខ្លាំង៕

ប្រភព៖ Smithsonian II https://www.smithsonianmag.com/category/science-nature/

រក្សាសិទ្ធិ©ដោយ៖ ពេទ្យយើង