ស្វែងយល់ពីប្រភេទនៃជំងឺឈឺក្បាល
ឈឺក្បាល សំដៅទៅលើការឈឺចុកចាប់ នៅចំពីលើលលាដ៍ក្បាល។ ការឈឺក្បាល មានច្រើនប្រភេទ អាស្រ័យទៅតាមពេល ដែលឈឺ កន្លែងដែលឈឺ និងកម្រិតនៃការឈឺចាប់។
មូលហេតុនៃការឈឺក្បាល អាចបណ្តាលមកពីការបំពុលនៃបរិយាកាស ការប្រើថ្នាំមួយចំនួន ឬការសេពគ្រឿងស្រវឹង ក្នុងបរិមាណយ៉ាងច្រើន។ បាក់ទឹកចិត្ដ ឬអារម្មណ៍មិនស្ងប់ គេងមិនគ្រប់ អង្គុយ ឬឈរមិនត្រូវជាមួយដងខ្លួន ការឆ្លងមេរោគ និងស្ត្រេស ក៏ជាមូលហេតុ បណ្តាលឱ្យឈឺក្បាលផងដែរ។
ជាទូទៅជំងឺឈឺក្បាល មានពីរប្រភេទធំៗ គឺរោគឈឺក្បាលខ្លាំង និងរោគឈឺមួយចំហៀងក្បាល។
រោគឈឺក្បាលខ្លាំង ជាទូទៅ បណ្តាលមកពីការឈឺក្បាល ក្នុងរយៈពេលយូរ។ ជំងឺនេះ កើតមកពីអារម្មណ៍ភ័យព្រួយបារម្ភ និងការកន្រ្តាក់សាច់ដុំ នៅបរិវេណក។ ក្នុងករណីនេះ អាការឈឺក្បាល អាចបន្តតិចៗ ជាមធ្យម និងឈឺពេញក្បាល។ អាការនេះ អាចមានរយៈពេលយូរ។ អ្នកជំងឺ គ្មានអាការចង់ក្អួតចង្អោរ ឬក្អួតទេ ហើយក៏មិនធ្ងន់ធ្ងរដែរ។
ស្ត្រេស អាចធ្វើឲ្យមានការឈឺក្បាលកាន់តែខ្លាំង ហើយអាចមានអាការធូរស្បើយ នៅពេលសម្រាក។ អារម្មណ៍ពិបាកប្រមូលផ្តុំ ឬអារម្មណ៍ធ្ងន់ក្បាល អាចធ្វើឲ្យមានការឈឺក្បាលដែរ។
នៅពេលអ្នកឈឺក្បាល ពេលព្រឹក នៅខាងក្រោយក្បាល ឬលើលលាដ៍ក្បាល គឺអាចបណ្តាលមកពីជំងឺលើសឈាម។
ម្យ៉ាងវិញទៀត អាការឈឺក្បាលញឹកញាប់ អាចបណ្តាលមកពីបញ្ហាភ្នែក (បញ្ហាវ៉ែនតា ឬការអង្គុយខុសលក្ខណៈនៅពីមុខកុំព្យូទ័រ)។
វិធានការសាមញ្ញ អាចជួយបន្ថយការឈឺក្បាល មានដូចជា ព្យាយាមបន្ថយស្រ្តេស បន្ថយការសេពគ្រឿងស្រវឹង និងហាត់ប្រាណជាប្រចាំ ដូចជា ហែលទឹក ឬដើរ ជាដើម។ ការអង្គុយធ្វើការក្នុងលក្ខណៈត្រឹមត្រូវ នៅមុខកុំព្យួទ័រ ក៏អាចជួយបន្ថយការតឹងនៃឆ្អឹងកងក និងបន្ថយការឈឺក្បាលផងដែរ។
ថ្នាំប្រឆាំងនឹងការឈឺចាប់ ដូចជា ថ្នាំប៉ារ៉ាសេតាម៉ុល ឬអេដវៀល អាចជួយបន្ថយការឈឺក្បាលរបស់អ្នកបាន។ ក្រោយញ៉ាំថ្នាំរួច អ្នកគេងសម្រាកបន្តិច នឹងបានធូរស្បើយ។
ប៉ុន្តែក្រោយញ៉ាំថ្នាំរួចហើយ នៅតែមិនធូរស្បើយ គឺអ្នកគួរតែទៅជួបគ្រូពេទ្យ នៅពេលអ្នកឈឺក្បាលខ្លាំង និងភ្លាមៗ ឬនៅពេលអាការឈឺក្បាលរបស់អ្នកប្តូរទៅជាការឈឺក្បាលខ្លាំង ឬមានរោគសញ្ញាថ្មីប្លែក ឬនៅពេលអ្នកឈឺក្បាល ហើយមានគ្រុនក្តៅ ជាប់ក វិលមុខ ភាំងស្មារតី ស្រវាំងភ្នែក ពិបាកនិយាយ ឬគាំងដៃជើង ស្ពឹករាងកាយ ជាដើម៕
រក្សាសិទ្ធិ©ដោយ៖ ពេទ្យយើង