រៀបចំ ៦យ៉ាងនេះ នៅពេលហាត់ប្រាណ
អ្នកជំនាញបានផ្តល់គន្លឹះថា មុនពេលចេញទៅហាត់ប្រាណ អ្នកគួររៀបចំខ្លួន យ៉ាងហោចណាស់ ៦ចំណុច គឺសម្លៀកបំពាក់ ស្បែកជើង ស្រោមដៃ កាបូបដាក់សម្ភារៈ សក់ និងដបទឹក។
១-សម្លៀកបំពាក់៖
សម្រាប់បុរស អាចស្លៀកពាក់ ខោកីឡាធម្មតា និងពាក់អាវយឺតបែបកីឡា ឬក៏អាវយឺតធម្មតាក៏បាន។ តែសម្រាប់ស្ត្រីវិញ សម្លៀកបំពាក់ពេលហាត់ប្រាណ ជារឿងសំខាន់។ ស្ត្រីត្រូវស្លៀកខោរឹប និងអាវយឺត ដោយមានអាវក្នុង ជាប្រភេទកីឡា ដើម្បីទប់សុដន់ មិនឲ្យខូចទ្រង់ទ្រាយ ឬមានចលនា។ ឯកសណ្ឋានកីឡា ធ្វើឲ្យអ្នកមានទំនុកចិត្ត និងសាច់មិនរយីករយាក ជាពិសេសពីចង្កេះចុះក្រោម រឹបណែនល្អ។
២- ស្បែកជើង៖
អ្នកហាត់ប្រាណ ត្រូវពាក់ស្បែកជើងប៉ាត់តា ប្រភេទហាត់កីឡា ដោយមិនអាចហាត់ដោយជើងទទេ ឬពាក់ស្បែកជើងផ្ទាត់ឡើយ។ បើហាត់ប្រាណដោយជើងទទេ ឬពាក់ស្បែកជើងផ្ទាត់ អាចបណ្ដាលឲ្យអ្នកគ្រេច ឬថ្លោះកជើង និងប្រអប់ជើង ព្រោះពេលហាត់ប្រាណ មានក្បាច់ខ្លះ ត្រូវប្រើកម្លាំងបាតជើង។ ម្យ៉ាងពេលអ្នកពាក់ស្បែកជើងប៉ាត់តា ឬស្បែកជើងឃ្លុប សម្រាប់ហាត់ប្រាណ គឺអាចការពារជើងរបស់អ្នកពីការប៉ះទង្គិច រលាត់ស្បែកបាន។
៣-ស្រោមដៃ
សម្រាប់អ្នកលើកដុំដែក យកសាច់ដុំ ត្រូវតែមានស្រោមដៃ និងកន្លែងផ្ទាល់ខ្លួន សម្រាប់ជូតញើសផងដែរ។ ស្រោមដៃ អាចការពារដៃរបស់អ្នក មិនឱ្យឈឺ ឬរលាក នៅពេលលើកដុំដែក។ រីកន្លែង ក្រៅពីជូតញើស អ្នកក៏អាចក្រាលលើកៅអី អង្គុយ ឬគេងលើកដុំដែក ជៀសវាងឆ្លងរោគ តាមរយៈញើសពីអ្នកដទៃផងដែរ។
៤-កាបូបដាក់សម្ភារៈ
អ្នកហាត់ប្រាណ គួរតែមានកាបូបដាក់សម្ភារៈ សម្រាប់ដាក់កាបូបលុយ ទូរស័ព្ទ ឬសម្លៀកបំពាក់កីឡា និងកន្សែងជូតញើស ជាដើម។
៥- សក់៖
ការរៀបចំសក់ សម្រាប់បុរស មិនមានបញ្ហាអ្វីទេ។ តែបើអ្នកមានសក់វែង ដែលអាចធ្លាក់ក្របភ្នែក និងមុខ គឺគួរតែចងឡើង ឬប្រើប្រាស់ក្រណាត់រឹបក្បាល ដែលអាចរុំសក់ការពារមិនឲ្យញើសធ្លាក់ដល់មុខ ( សម្រាប់អ្នកហាត់កីឡា )។ ចំណែកស្ត្រីវិញ ត្រូវតែចងសក់ ឬបួងសក់ឡើងលើ ទៅក្រោយ ឲ្យស្រឡះ ដើម្បីធ្លាក់ចូលមុខមាត់ ហើយនៅពេលហាត់ប្រាណ បែកញើស នឹងរញ៉េរញ៉ៃ ហើយញើសទទឹកសក់ផង។
៦- ដបទឹក៖
អ្នកហាត់ប្រាណទាំងឡាយ ត្រូវតែមានដបទឹក ឬកំប៉ុងទឹក សម្រាប់ញ៉ាំ នៅពេលហាត់ប្រាណ ព្រោះពេលហាត់ប្រាណ អ្នកបានបញ្ចេញជាតិទឹកច្រើន តាមរយៈញើស។ ដូច្នេះក្រោយពេលឈប់សម្រាកមួយសន្ទុះ អ្នកអាចញ៉ាំផឹក ដែលអាចផ្តល់សុវត្ថិភាពផ្ទាល់ខ្លួន ដោយមិនប្រើប្រាស់កែវទឹករួម នៅកន្លែងហាត់ប្រាណនោះទេ៕
រក្សាសិទ្ធិ©ដោយ៖ ពេទ្យយើង