អត្ថប្រយោជន៍ និងសារៈសំខាន់នៃការលាងឈាម
ការលាងឈាម (Dialysis) គឺជាការលាងសម្អាតកាកសំណល់ និងវត្ថុរាវលើសនៅក្នុងឈាម នៅពេលខូចមុខងារក្រលៀន។ ជាធម្មតា ក្រលៀន មានមុខងារសម្អាតឈាម និងបញ្ចេញកាកសំណល់តាមទឹកនោម។ ប៉ុន្តែនៅពេលក្រលៀន មានបញ្ហា ការលាងឈាម ជារឿងចាំបាច់ សម្រាប់អ្នកជំងឺក្រលៀនរ៉ាំរ៉ៃ។
ហេតុអ្វីបានជាត្រូវលាងឈាម?
១. ជំនួសមុខងារក្រលៀន៖ នៅពេលក្រលៀនដំណើរការមិនប្រក្រតី ឬអ្នកមានជំងឺក្រលៀនរ៉ាំរ៉ៃ ក្រលៀនមិនអាចសម្អាតឈាម បានល្អនោះទេ។ អ្នកត្រូវការការលាងឈាម ដើម្បីសម្អាតកាកសំណល់ និងជាតិទឹកលើសក្នុងឈាម។
២. ការពារគ្រោះថ្នាក់ដល់ជីវិត៖ កាកសំណាល់ និងជាតិទឹកលើសបរិមាណ អាចបង្កបញ្ហាមិនល្អដល់រាងកាយ។ មិនបានព្យាបាល អ្នកអាចប្រឈមនឹងរោគសញ្ញាមិនល្អជាច្រើន ក៏ដូចជាគ្រោះថ្នាក់ដល់អាយុជីវិតផងដែរ។
៣. បង្ការការកកើតកាកសំណល់៖ ការលាងឈាម ជួយសម្អាតកាកសំណល់ ពីក្នុងឈាមមុនមានការកកកុញ។
តើអ្នកជំងឺ ត្រូវការការលាងឈាម រយៈពេលយូរប៉ុណ្ណា?
១. ប្រសិនបើអ្នកមានជំងឺក្រលៀន រយៈពេលខ្លី អ្នកត្រូវការលាងឈាមរយៈពេលខ្លីដូចគ្នា គឺនៅពេលជាសះស្បើយ ពីជំងឺក្រលៀន។
២. ប្រសិនបើអ្នកត្រូវវះកាត់ដូរក្រលៀន អ្នកត្រូវលាងឈាមរហូតដល់ប្ដូរក្រលៀនបានសម្រេច។
៣. ប្រសិនបើអ្នកប្ដូរក្រលៀនហើយ នៅតែមានបញ្ហាសុខភាព អ្នកនឹងត្រូវលាងឈាមពេញមួយជីវិត។
តើការលាងឈាម ដំណើរការបែបណា?
ការលាងឈាមមាន ២ប្រភេទគឺ haemodialysis និង peritoneal។
១. វិធី Haemodialysis៖
- វាជាវិធីលាងឈាមទូទៅ និងមានគេស្គាល់ច្រើន
- ក្នុងវិធីនេះ គេប្រើម្ជុលចាក់ដៃ រួចបូមឈាមចេញតាមបំពង់មួយ
- ឈាមដែលគេបូម នឹងត្រូវយកទៅលាងក្នុងម៉ាស៊ីន
- ឈាមដែលលាងរួច នឹងត្រូវបូមបញ្ចូលវិញតាមបំពង់់ថ្មីមួយទៀត
២. វិធី Peritoneal៖
- ក្នុងវិធីនេះ គេប្រើស្រោមពោះខាងក្នុង (Peritoneum) ជាឧបករណ៍សម្អាត ជំនួសម៉ាស៊ីនលាងឈាម ព្រោះវាមានមុខងារសម្អាត ដូចក្រលៀនដែរ
- ដើម្បីលាងឈាម គេចោះប្រហោងមួយក្នុងពោះ ដើម្បីដាក់បំពង់
- ពោះរបស់អ្នក នឹងត្រូវរក្សាទុកប្រហោងនេះ ជារៀងរហូត
- គេនឹងបូមទឹកចូលទៅក្នុងប្រហោងនេះ តាមបំពង់ ដើម្បីលាងកាកសំណល់
- ទឹកដែលគេប្រើប្រាស់ ដើម្បីលាងរួច នឹងត្រូវគេបូមចេញ ក្នុងរយៈពេលប៉ុន្មានម៉ោងបន្ទាប់ និងជំនួសដោយទឹកថ្មី
ផលប៉ះពាល់នៃការលាងឈាម៖
១. វិធី Haemodialysis អាចបង្កបញ្ហារមាស់ស្បែក និងរមួលសាច់ដុំ
២. វិធី Peritoneal អាចបង្កបញ្ហារលាកស្រោមពោះ
៣. វិធីទាំងពីរ អាចបង្កការខ្សោយកម្លាំង
ប្រភព៖
NHS UK II https://www.nhs.uk/
រក្សាសិទ្ធិ©ដោយ៖ ពេទ្យយើង