ញ៉ាំទឹកឱ្យបានច្រើន និងហាត់ប្រាណ អាចការពារ មិនឱ្យកើតជំងឺទល់លាមក
នៅក្នុងកម្មវិធីសន្ទនាអំពីសុខភាពរបស់ពេទ្យយើង លោកវេជ្ជបណ្ឌិត ឆាយ ណារិន ផ្នែកជំងឺទូទៅនៃមន្ទីរសម្រាកព្យាបាល និងសម្ភព គង់ គីមចាន់ បានលើកឡើងពី «ការទល់លាមករ៉ាំរ៉ៃ»។ ការទល់លាមករ៉ាំរ៉ៃ មានអាការៈ ដូចជា អ្នកជំងឺពិបាកបត់ជើង លាមករឹងៗ ឬដុំៗ មានអារម្មណ៍ថា បត់ជើង ឬបន្ទោរបង់មិនអស់ មានអារម្មណ៍ ស្ទះៗ នៅក្រសាគូទ ដែលបត់ជើងមិនអស់ ឬក៏បត់ជើង ៣ដង ក្នុង ១សប្តាហ៍ ឬក៏ច្រើនជាងនេះ។ តែបត់ជើង ឬបន្ទោរបង់មកតិចតួច។ ការទល់លាមក ដូចរៀបរាប់ទាំងនេះ ចាប់ពី ៦ខែឡើងទៅ គេហៅថា ការទល់លាមករ៉ាំរ៉ៃ។
មូលហេតុ ដែលនាំដល់ការទល់លាមករ៉ាំរ៉ៃ បណ្តាលមកពីអ្នកជំងឺ មិនសូវបរិភោគអាហារ ដែលមានជាតិសរសៃហ្វៃប័រ មិនញ៉ាំទឹកច្រើន មិនចូលចិត្តលេងកីឡា គិតច្រើន ហើយពិសេសចំពោះស្ត្រីមានផ្ទៃពោះ។
ការទល់លាមកនេះ ភាគច្រើន កើតឡើងអ្នកមានអាយុ ៥០ឆ្នាំឡើង ហើយកើតលើស្ត្រី ច្រើនជាងមនុស្សប្រុស និងភាគច្រើន កើតលើមនុស្សធាត់។
លោកវេជ្ជបណ្ឌិត ឆាយ ណារិន បានបន្ថែមថា ការទល់លាមក ក៏អាចបណ្តាលមកពីជំងឺផ្សេងទៀតដែរ ដូចជា ជំងឺមហារីកបេះដូង មានដុំនៅពោះវៀន ហើយទាក់ទងនឹងក្រពេញទីរ៉ូអ៊ីត ចុះទាបពេក ព្រមទាំងទាក់ទងនឹងការបាត់បង់ប៉ូតាស្យូមច្រើនពេក ក៏ធ្វើឱ្យទល់លាមក ហើយទាក់ទងជាមួយនឹងការឡើងកាល់ស្យូមច្រើន ក៏ធ្វើឱ្យទល់លាមកដែរ។ ជំងឺដាច់សរសៃឈាមខួរក្បាល ក៏ធ្វើឱ្យអ្នកជំងឺទល់លាមកដែរ។
ផលវិបាកនៃជំងឺទល់លាមក ដែលមិនបានព្យាបាល ត្រូវបានលោកវេជ្ជបណ្ឌិត ឆាយ ណារិន លើកឡើងថា ធ្វើឱ្យអ្នកជំងឺរហែកក្រសាគូទ ធ្វើឱ្យមានឫសដូងបាត មានដំបៅពោះវៀនធំ ស្ទះពោះវៀន ធ្វើឱ្យហូរឈាមតាមលាមក ជាដើម។ នៅពេលស្ទះខ្លាំង យើងប្រឹងបត់ជើង ក៏ធ្វើឱ្យដាច់សរសៃឈាម ហើយក៏ហូរឈាមតាមលាមក។ ករណីនេះ ភាគច្រើនកើតឡើងលើមនុស្សចាស់ ដែលមិនបានមកព្យាបាលនៅពេលកើតមានជំងឺទល់លាមក។
លោកវេជ្ជបណ្ឌិត ឆាយ ណារិន បន្ថែមថា អ្នកជំងឺទល់លាមក ដែលត្រូវមកពិនិត្យព្យាបាល ជាមួយគ្រូពេទ្យ នៅពេលក្តៅខ្លួនខ្លាំង ចុកពោះខ្លាំង ពោះហើមខ្លាំង និងមានការហូរឈាមតាមលាមក ត្រូវរួសរាន់មកកាន់មន្ទីរពេទ្យ ដើម្បីពិនិត្យព្យាបាលឱ្យទាន់ពេលវេលា។ អ្នកជំងឺទល់លាមក ត្រូវផ្លាស់ប្តូរទម្លាប់នៃការរស់នៅ ញ៉ាំអាហារដែលមានជាតិហ្វៃប័រ ញ៉ាំទឹកដោះគោ ញ៉ាំទឹកឱ្យបានច្រើន ចាប់ពី ២លីត្រ ទៅ ៣លីត្រ ក្នុង ១ថ្ងៃៗ។ ក្រៅពីនោះ ក៏នៅមានថ្នាំពេទ្យមួយចំនួនទៀត។ ប៉ុន្តែបើព្យាបាលដោយវិធីខាងលើនេះ មិនជោគជ័យទេ គ្រូពេទ្យក៏ត្រូវវះកាត់ ប្រសិនបើជំងឺទល់លាមកនោះ បណ្តាលមកពីដុំសាច់នៅក្នុងពោះវៀន។
ចំពោះវិធីការពារជំងឺទល់លាមករ៉ាំរ៉ៃ ត្រូវបានលោកវេជ្ជបណ្ឌិត ឆាយ ណារិន លើកឡើងថា យើងត្រូវញ៉ាំទឹកឱ្យបានច្រើន ចាប់ពី ២លីត្រឡើង ក្នុង១ថ្ងៃ ហាត់ប្រាណឲ្យបានយ៉ាងហោចណាស់ ៣ដង ក្នុង ១សប្តាហ៍ ដោយម្តងៗ រយៈពេល ២០នាទីឡើងលើ ហើយពេលមានអារម្មណ៍ថា ឈឺបត់ជើង ឬបន្ទោរបង់ ត្រូវទៅកាន់បន្ទប់ទឹក បត់ជើង ឬបន្ទោរបង់ កុំនៅរង់ចាំយូរ។ ក្នុងនោះ យើងក៏ត្រូវញ៉ាំអាហារ ដែលមានជាតិសរសៃហ្វៃប័រ ឱ្យបានច្រើន ញ៉ាំផ្លែឈើ និងញ៉ាំគ្រាប់ធញ្ញជាតិ ជាដើម។
សូមបញ្ជាក់ថា មន្ទីរសម្រាកព្យាបាល និងសម្ភព គង់ គីមចាន់ បានប្រើប្រាស់នូវកម្មវិធីពេទ្យយើង។ កម្មវិធីពេទ្យយើង បង្កើតដោយក្រុមហ៊ុន ហ្វឺស វីម៉ិនថេក អេស៊ា ជាប្រព័ន្ធគ្រប់គ្រងមន្ទីរពេទ្យឌីជីថលដំបូងគេនៅកម្ពុជា ដើម្បីចូលរួមចំណែកកសាងប្រព័ន្ធសុខាភិបាលទំនើប បែបឌីជីថល នៅកម្ពុជា និងសម្រាប់សហគមន៍អាស៊ាន តាមរយៈការផ្តល់សុវត្ថិភាពដល់កំណត់ត្រាព្យាបាល ទិន្នន័យសុខភាពអ្នកជំងឺ និងជួយឲ្យគ្លីនិក និងមន្ទីរពេទ្យដៃគូដំណើរការរលូន និងពុំមានការរំខាន៕
រក្សាសិទ្ធិ©ដោយ៖ ពេទ្យយើង