WHO៖ Omicron មិនសូវធ្ងន់ធ្ងរដូច Delta ប៉ុន្តែបង្កគ្រោះថ្នាក់ សម្រាប់អ្នក ដែលមិនបានចាក់វ៉ាក់សាំង
ប្រធានអង្គការសុខភាពពិភពលោក (WHO) បាននិយាយកាលពីថ្ងៃពុធ ទី១២ ខែមករាថា Omicron មានការឆ្លងខ្លាំង និងមានរោគសញ្ញាតិចជាងប្រភេទ Delta ប៉ុន្តែវានៅតែជាមេរោគដ៏គ្រោះថ្នាក់ខ្លាំងបំផុត ជាពិសេសសម្រាប់អ្នកដែលមិនបានចាក់ថ្នាំវ៉ាក់សាំងបង្ការ។
ថ្លែងនៅក្នុងសន្និសីទសារព័ត៌មានមួយ ប្រធានអង្គការសុខភាពពិភពលោក Tedros Adhanom Ghebreyesus បាននិយាយថា ប្រទេសជាង ៩០ មិនទាន់សម្រេចបានគោលដៅនៃការចាក់វ៉ាក់សាំង ៤០% នៃចំនួនប្រជាជនរបស់ពួកគេ ហើយជាង ៨៥% នៃប្រជាជននៅទ្វីបអាហ្រ្វិក មិនទាន់ទទួលបានវ៉ាក់សាំងបង្ការជំងឺកូវីដ-១៩ ដូសទី១ នោះទេ។
លោក Tedros បាននិយាយថា «យើងមិនត្រូវអនុញ្ញាតឲ្យវីរុសនេះ បក់បោកដោយសេរី និងបង្កភាពវឹកវរនោះទេ ជាពិសេសខណៈដែលប្រជាពលរដ្ឋជាច្រើន ជុំវិញសកល មិនទាន់ចាក់វ៉ាក់សាំងនៅឡើយ»។
លោកបន្ថែមថា នៅក្នុងរបាយការណ៍ប្រចាំសប្តាហ៍នៃជំងឺកូវីដ-១៩ របស់ WHO ចេញផ្សាយកាលពីថ្ងៃអង្គារ បង្ហាញថា ករណីឆ្លងបានកើនឡើង ៥៥% ឬស្មើនឹង ១៥លានករណី ក្នុងមួយសប្តាហ៍ ដើមខែមករានេះ។ ក្នុងរយៈពេល ៩សប្តាហ៍ចុងក្រោយនេះ មានកណីឆ្លងយ៉ាងកំហុកពីមួយសប្តាហ៍ ទៅមួយសប្តាហ៍។
លោក Tedros ថា «ការកើនឡើងនៃការឆ្លងយ៉ាងខ្លាំងដូច្នេះ ភាគច្រើនជាប្រភេទបំប្លែងថ្មីអូមីក្រុង ហើយជាកត្តាជំរុញអោយវីរុសនេះ នាំមុខមេរោគកូវីដ-១៩ ប្រភេទដែលតា យ៉ាងឆាប់រហ័ស ស្ទើរតែគ្រប់ប្រទេសទាំងអស់»។
លោកបាននិយាយថា អ្នកជំងឺកូវីដ-១៩ ដែលសម្រាកព្យាបាលនៅមន្ទីរពេទ្យ ជុំវិញពិភពលោក ភាគច្រើន មិនបានចាក់វ៉ាក់សាំងបង្ការជំងឺកូវីដនោះទេ ហើយប្រសិនបើការចម្លង មិនមានការថយចុះនោះទេ ហានិភ័យធំនៃការបំប្លែងថ្មី នឹងអាចលេចចេញមក ហើយអាចឆ្លងច្រើន និងស្លាប់ច្រើនផងដែរ៕
រក្សាសិទ្ធិ©ដោយ៖ ពេទ្យយើង