មកត្រឹមពេលនេះ កូវីដ ១៩ បំប្លែងខ្លួន បានប៉ុន្មានប្រភេទហើយ?
ចាប់តាំងពីវីរុសកូរ៉ូណា (COVID-19 ឬ SARS-COV-2) លេចមុខចេញដំបូង កាលពីចុងឆ្នាំ២០១៩ អ្នកជំនាញវេជ្ជសាស្ត្របានព្យាយាមយ៉ាងខ្នះខ្នែង ក្នុងការសិក្សា ស្វែងយល់ពីវីរុសនេះ និងស្វែងរកវិធីព្យាបាល តាមរយៈវ៉ាក់សាំង និងថ្នាំគ្រាប់ជាដើម។
ទោះជាយ៉ាងណា វីរុសនេះ បាន និងកំពុងបន្តសក្ដានុពល បំប្លែងខ្លួន ចេញជាច្រើនប្រភេទ និងបង្កហានិភ័យ ទូទាំងសកលលោក អស់រយៈពេលជាង ២ឆ្នាំមកនេះ។
គិតត្រឹមដើមខែមករា ឆ្នាំ២០២២ វីរុសកូរ៉ូណា បានបំប្លែងជាច្រើនប្រភេទ៖
១. អាល់ហ្វា (Alpha ឬ B.1.1.7)៖
- រកឃើញដំបូង នៅចក្រភពអង់គ្លេស ក្នុងខែកញ្ញា ឆ្នាំ២០២០
- កើតមានក្នុងប្រទេសចំនួន ១៩៣ប្រទេស
- ករណីខ្ពស់បំផុតនៅ (១) ចក្រភពអង់គ្លេស (២) សហរដ្ឋអាមេរិក និង (៣) អាល្លឺម៉ង់
២. បេតា (Beta ឬ B.1.351)៖
- រកឃើញដំបូង ក្នុងប្រទេសអាហ្វ្រិកខាងត្បូង ក្នុងខែឧសភា ឆ្នាំ២០២០
- កើតមានក្នុងប្រទេសចំនួន ១៤១ប្រទេស
- ករណីខ្ពស់បំផុតនៅ (១) អាហ្រិកខាងត្បូង (២) បារាំង និង (៣) ហ្វីលីពីន
៣. ហ្គាម៉ា (Gamma ឬ P.1)៖
- រកឃើញដំបូងក្នុងប្រទេសប្រេស៊ីល ក្នុងខែវិច្ឆិកា ឆ្នាំ២០២០
- កើតមានក្នុងប្រទេសចំនួន ៩១ប្រទេស
- ករណីខ្ពស់បំផុតនៅ (១) ប្រេស៊ីល (២) សហរដ្ឋអាមេរិក និង (៣) កាណាដា
៤. ដែលតា (Delta ឬ B.1.617.2)៖
- រកឃើញដំបូងក្នុងប្រទេសឥណ្ឌា ក្នុងខែតុលា ឆ្នាំ២០២០
- កើតមានក្នុងប្រទេសចំនួន ១៧០ប្រទេស
- ករណីខ្ពស់បំផុតនៅ (១) សហរដ្ឋអាមេរិក (២) ចក្រភពអង់គ្លេស និង (៣) អាល្លឺម៉ង់
៥. ឡាំដា (Lambda ឬ C.37)៖
- ត្រូវបានរកឃើញដំបូងក្នុងប្រទេសប៉េរូ ក្នុងខែធ្នូ ឆ្នាំ២០២០
- កើតមានក្នុងប្រទេសចំនួន ២៩ប្រទេស
- ករណីខ្ពស់បំផុតនៅ (១) ឈីលី (២) សហរដ្ឋអាមេរិក និង (៣) ប៉េរូ
៦. មូ (Mu ឬ B.1.621)៖
- រកឃើញដំបូងក្នុងប្រទេសកូឡុំប៊ី ក្នុងខែមករា ឆ្នាំ២០២១
- កើតមានក្នុងប្រទេសចំនួន ៤៣ប្រទេស
- ករណីខ្ពស់បំផុតនៅ (១) កូឡុំប៊ី (២) អេក្វាឌ័រ (៣) ទ្វីបអាមេរិកខាងត្បូង និង (៤) អឺរ៉ុប
៧. អូមីក្រុង (Omicron ឬ B.1.1.529)៖
- រកឃើញដំបូងក្នុងប្រទេសមួយចំនួន រួមមាន បូតស្វាណា និងអាហ្វ្រិកខាងត្បូង ក្នុងខែវិឆ្ឆិកា ឆ្នាំ២០២១
- កើតមានក្នុងប្រទេសចំនួន ៨៩ប្រទេស
- ករណីខ្ពស់បំផុតនៅ (១) ចក្រភពអង់គ្លេស (២) សហរដ្ឋអាមេរិក និង (៣) ដាណឺម៉ាក
នៅដើមខែមករានេះ ក្រុមអ្នកស្រាវជ្រាវ នៅប្រទេស Cyprus បានប្រកាសពីការរកឃើញវ៉ារ្យ៉ង់ថ្មីមួយ បំប្លែងថ្មី ដែលតាក្រុង (Deltacron) ដែលរួមបញ្ចូលគ្នារវាងវីរុសកូវីដ-១៩ ប្រភេទដែលតា (Delta) និងអូមីក្រុង(Omicron)។ ប៉ុន្តែមេរោគកូវីដ១៩ បំប្លែងថ្មី ដែលរួមបញ្ចូលគ្នារវាងដែលតា និងអូមីក្រុង Deltacron មិនទាន់បញ្ជាក់ផ្លូវការពីអង្គការសុខភាពពិភពលោក នៅឡើយទេ៕
ប្រភព៖ WHO II https://www.who.int/, UNRIC II United Nations in Western Europe - UNRIC Brussels, WalesOnline II https://www.walesonline.co.uk/, Gavi II https://www.gavi.org/ & Global News II https://globalnews.ca/
រក្សាសិទ្ធិ©ដោយ៖ ពេទ្យយើង