ប៉ាម៉ាក់វ័យក្មេង គួរស្វែងយល់ពីការលូតលាស់របស់ទារក ចាប់ពីកកើតក្នុងផ្ទៃ ពេលកើត រហូតដល់អាយុ ២ឆ្នាំ
នៅក្នុងកម្មវិធីសន្ទនាអំពីសុខភាពរបស់ពេទ្យយើង កញ្ញាវេជ្ជបណ្ឌិត ខេង ស៊ីសាណារ៉ា ឯកទេសរោគកុមារ និងរោគស្ត្រី នៃមន្ទីរសម្រាកព្យាបាល ហ្វាម៉ាលី បានលើកឡើងពីការលូតលាស់របស់កុមារ។ ក្នុងនោះ ប៉ាម៉ាកវ័យក្មេង គួរស្វែងយល់ពីការលូតលាស់របស់ទារក ចាប់ពីកកើតក្នុងផ្ទៃ នៅពេលកើត រហូតដល់អាយុ ២ឆ្នាំ។
.ពេលមានផ្ទៃពោះ រហូតដល់សម្រាល៖
ស្ត្រីមានផ្ទៃពោះ ត្រូវពិនិត្យផ្ទៃពោះ ដើម្បីមើលការវិវឌ្ឍន៍ និងការលូតលាស់របស់ទារក តាមរយៈការឆ្លុះអេកូ រៀងរាល់ខែ ឬក៏តិចបំផុត ឲ្យបាន ៥ដង មុនសម្រាល។ បើមិនបានឆ្លុះអេកូ ពិនិត្យផ្ទៃពោះឲ្យបានគ្រប់គ្រាន់ទេ នោះយើងមិនដឹងពីការវិវឌ្ឍន៍ ការលូតលាស់ និងសុខភាពរបស់ទារកទេ។ ដូចជា ទារកអាចកើតមក ឆែបបបូរមាត់ ឬឆែបក្រអូបមាត់ ឬក៏ខ្វះនូវអវយវៈណាមួយ ជាដើម។
ក្នុងអំឡុងពេលមានផ្ទៃពោះ ស្ត្រីមានផ្ទៃពោះ ក៏គួរតែមានរបបអាហារ
ដែលមានសារធាតុសំខាន់ៗ ដើម្បីជួយដល់ការលូតលាស់របស់ទារក ដូចជា៖ ជាតិអាស៊ីតហ្វូលីក កាល់ស្យូម វីតាមីន អាស៊ីតខ្លាញ់អូមេហ្គា ឬក៏ប្រភេទប័រ ហើយអ្វីដែលពិសេសនោះ គឺសារជាតិដែក។ សារធាតុទាំងអស់នេះ មាននៅក្នុងចំណីអាហារ ត្រីសាច់ បន្លែគ្រប់ប្រភេទ។
ដូច្នេះពេលពិនិត្យអេកូ តាមដានផ្ទៃពោះ គ្រូពេទ្យអាចណែនាំឲ្យបន្ថែមសារធាតុទាំងអស់នេះ សម្រាប់ជួយដល់ការលូតលាស់របស់ទារក។
.បន្ទាប់ពីទារកកើតហើយ៖
ការបំបៅដោះកូន ជាការល្អបំផុត ចាប់ពីទារកទើបកើត រហូតដល់ ៦ខែដំបូង។ ៦ខែ ដល់ ២ឆ្នាំ ទារកអាចទទួលអាហារបន្ថែម ដូចជា បបរខាប់គ្រប់គ្រឿង រួមទាំងការទម្លាប់ការញ៉ាំអាហារប្រកបដោយសុខភាព ជាដើម។ ដូច្នេះឪពុកម្តាយវ័យក្មេង អាចស្វែងយល់ ដោយមិនមែនឲ្យតែកូនយំ ត្រូវបំបៅដោះកូន ឬក៏ដាក់អាហារបំប៉នឲ្យកូនញ៉ាំនោះទេ។
កញ្ញាវេជ្ជបណ្ឌិត ខេង ស៊ីសាណារ៉ា បន្ថែមថា ទារកទើបកើត គេងច្រើន។ ចាប់ពីកើត រហូតដល់អាយុ ៣ខែ
ជាទូទៅ ទារកអាចគេងពី ៨ម៉ោង ទៅ ១២ម៉ោង ក្នុង ១ថ្ងៃ។ ទារកគេងធម្មតា អាចប្រហែលជា ១៤ម៉ោង ទៅ ១៧ម៉ោង ក្នុង ១ថ្ងៃ ហើយក៏មានទារកខ្លះ គេងដល់ ១៨ម៉ោង ទៅ ១៩ម៉ោង ក្នុង ១ថ្ងៃផងដែរ។
.ការជុះនោមដំបូងរបស់ទារក ឬអាចម៍ព្រៃ៖
ទារកទើបកើត ក្នុង ២៤ម៉ោងដំបូង នឹងជុះនោម ៩៣% ហើយខ្លះ អាចដល់ ៤៨ម៉ោង។
.ទម្ងន់របស់ទារក៖
ទារកធម្មតា ទើបកើត មានទម្ងន់ចន្លោះពី ២,៥គ.ក ទៅ ៤គ.ក។ ការវះកាត់ ពេលសម្រាល អាចមានកត្តាម្តាយ និងទារក ដូចជា សុខភាពម្តាយមិនល្អ ឬក៏ទារកលើសទម្ងន់ រហូតដល់ជាង ៤គ.ក ឬក៏ទារក រុំកនឹងទងសុក ជាដើម។
កូនកើតមិនគ្រប់ខែ គឺកើតមុន ៣៧សប្តាហ៍។ ទារកកើតធម្មតាពី ៣៧សប្តាហ៍ ទៅ ៤២សប្តាហ៍។ ក្នុងនោះ ក៏អាចមានកូនកើតលើសខែ រហូតដល់ ៤៤សប្តាហ៍ ឬលើសនេះទៀត។ ករណីនេះ តម្រូវឲ្យត្រូវវះកាត់។ កូនកើតលើសខែ អាចមកពីកត្តាអ័រមូន ចំណីអាហារ ឬក៏មិនមានលំហាត់ប្រាណ ជាដើម។ តែមិនមានកត្តាជាក់លាក់ទេ។
បន្ទាប់ពីកើតមកហើយ ដំបូង ៧ថ្ងៃ ទៅ ១០ថ្ងៃ ទារកអាចស្រកគីឡូ ១ ទៅ ១.២% នៃគីឡូ ដែលទើបកើត។ នេះដោយសារតែការជុះនោម អាចម៍ព្រៃ។ តែចាប់ពី ១០ថ្ងៃឡើងទៅ ទារកចាប់ផ្តើមឡើងគីឡូ។ ១ថ្ងៃ អាចឡើងពី ១០ ទៅ ២០ក្រាម ក្នុង ១ថ្ងៃ។
.ក្រពះរបស់ទារក៖
ឪពុកម្តាយវ័យក្មេង ត្រូវដឹងថា កូនយំ តើឃ្លាន ឬក៏មានបញ្ហាអ្វី? ដូច្នេះឪពុកម្តាយ ត្រូវដឹងពីទំហំក្រពះរបស់ទារក។ ទារកទើបកើត នៅថ្ងៃទី១ មានទំហំក្រពះតូច ចាប់ពី ៥ ទៅ ៧មីលីម៉ែត្រ។ ថ្ងៃទី២ មានទំហំពី ២២ ទៅ ២៤មីលីម៉ែត្រ
ពីថ្ងៃទី៣ ទៅ ១អាទិត្យ មានទំហំ ៤៥មីលីម៉ែត្រ ទៅ ៦០មីលីម៉ែត្រ ហើយ ១ខែ ទំហំក្រពះរបស់ទារក ត្រឹមតែប៉ុនពងទាទេ។ ដូច្នេះឪពុកម្តាយ ត្រូវដឹងពីទំហំក្រពះរបស់ទារក ដើម្បីកុំឲ្យចេះតែបញ្ច្រកកូនដោះ ឬទឹកដោះគោកូន រហូតដល់កូនក្អែមកវិញ។
ឪពុកម្តាយវ័យក្មេង គួរស្វែងយល់ពីការវិវត្តរបស់ទារក ដោយត្រូវប្រយ័ត្នកូនកើតជំងឺអូទីហ្សឹម ក្នុងចន្លោះទារកមានអាយុពី ១ថ្ងៃ ដល់ ២ឆ្នាំ ឬ១០០០ថ្ងៃដំបូង។ អូទីហ្សឹម ជាជំងឺមួយកើតលើវិបត្តិអាកប្បកិរិយា ពិសេសប៉ះពាល់លើទំនាក់ទំនងរបស់កុមារ និងអ្នកដទៃ។
ឯកសារបង្ហាញថា ជំងឺ អូទីហ្សឹម (Autism) អាចកើតមានឡើង ចំពោះទារក នៅពេលចាប់កំណើតក្នុងផ្ទៃម្ដាយ។ ភាគច្រើនកុមារ ដែលកើតជំងឺនេះ បង្ហាញរោគសញ្ញា នៅពេលអាយុចន្លោះពី ៣ខែ ទៅ ២ឆ្នាំ។ គេអាចកត់សំគាល់ថា កុមារកើតជំងឺអូទីហ្សឹម ដោយសារកុមារនោះ ចូលចិត្តនៅម្នាក់ឯង មិនចាប់អារម្មណ៍ចំពោះអ្នកនៅជុំវិញខ្លួន អាយុដល់ ២ឆ្នាំហើយ មិនទាន់ចេះនិយាយ និងពេលខឹងម្តងៗ មិនចង់ឱ្យគេលួងលោម ជាដើម។
គ្រូពេទ្យជំនាញកុមារ ឱ្យដឹងថា ជំងឺអូទីហ្សឹម គឺជាប្រភេទពិការភាពម្យ៉ាង កើតមានចំពោះកុមារ ដែលនាំឱ្យប៉ះពាល់ទៅលើការលូតលាស់រាងកាយ សតិបញ្ញាស្មារតី ប៉ះពាល់ទៅលើផ្នែកទំនាក់ទំនងសង្គម និងការស្ដែងចេញនូវអាកប្បកិរិយារបស់កុមារ។ កុមារអូទីហ្សឹម ពិបាកក្នុងការប្រាស្រ័យទាក់ទងជាមួយអ្នកដទៃ រួមមាន ឪពុកម្ដាយ បងប្អូន និងកុមារដទៃ ដោយបង្ហាញកាយវិការ ចរិតឫកពារ ខុសប្លែកពីមនុស្សធម្មតា។
កញ្ញាវេជ្ជបណ្ឌិត ខេង ស៊ីសាណារ៉ា បន្តថា អូទីហ្សឹម ជាជំងឺមួយ ដែលយើងអាចដឹងទាន់ពេលវេលា ប្រសិនបើយើងបានដឹងច្បាស់ពីការលូតលាស់របស់កុមារ។ ដូច្នេះកាតព្វកិច្ចរបស់ឪពុកម្តាយ សំខាន់ក្នុងការជួយកូន កុំឲ្យកើតជំងឺអូទីហ្សឹម។
កញ្ញាវេជ្ជបណ្ឌិត ខេង ស៊ីសាណារ៉ា បន្ថែមថា ជំងឺ ដែលទារកច្រើនជួបប្រទះ ក្នុងអាយុចាប់ពីកើត រហូតដល់ ២ឆ្នាំ មានដូចជា រាករូស រលាកបំពង់ក ផ្តាសាយរ៉ាំរ៉ៃ រហូតឈានទៅរលាកទងសួត ផងដែរ។
សូមបញ្ជាក់ថា មន្ទីរសម្រាកព្យាបាល ហ្វាម៉ាលី គឺជាមន្ទីរពេទ្យឯកជន នៅក្នុងរាជធានីភ្នំពេញ ដែលបានប្រើប្រាស់កម្មវិធីពេទ្យយើង។ កម្មវិធីពេទ្យយើង បង្កើតដោយក្រុមហ៊ុន ហ្វឺស វីម៉ិនថេក អេស៊ា ជាប្រព័ន្ធគ្រប់គ្រងមន្ទីរពេទ្យឌីជីថលដំបូងគេនៅកម្ពុជា ដើម្បីចូលរួមចំណែកកសាងប្រព័ន្ធសុខាភិបាលទំនើប បែបឌីជីថល នៅកម្ពុជា និងសម្រាប់សហគមន៍អាស៊ាន តាមរយៈការផ្តល់សុវត្ថិភាពដល់កំណត់ត្រាព្យាបាល ទិន្នន័យសុខភាពអ្នកជំងឺ និងជួយឲ្យគ្លីនិក និងមន្ទីរពេទ្យដៃគូដំណើរការរលូន និងពុំមានការរំខាន៕
រក្សាសិទ្ធិ©ដោយ៖ ពេទ្យយើង