ជំងឺអាលែកហ្ស៊ី មានទំនាក់ទំនងនឹងជំងឺហឺត
ក្នុងកម្មវិធី «សន្ទនាអំពីសុខភាព» របស់ពេទ្យយើង លោកសាស្ត្រាចារ្យ គឹម អាង នាយករងនៃមន្ទីរពេទ្យកុមារជាតិ និងជាប្រធានផ្នែកអាលែកហ្ស៊ី និងផ្លូវដង្ហើម នៃមន្ទីរពេទ្យកុមារជាតិ បានលើកឡើងថា ជំងឺអាលែកហ្សី និងជំងឺហឺត មានទំនាក់ទំនងគ្នា ហើយភាគច្រើន កើតលើកុមារ។
តាមលោកវេជ្ជបណ្ឌិត អាលែកហ្ស៊ី ជាការខូចខាតនៃប្រព័ន្ធរាងកាយរបស់យើង ទៅនឹងសារធាតុ ជាពិសេសសារធាតុ ដែលយើងចាត់ទុកថា ជាសារធាតុ ដែលមានប្រតិកម្ម ហើយអ្នកដែលមានបញ្ហាអាលែកហ្ស៊ីនេះ ងាយនឹងប្រតិកម្មឆ្លើយតបនឹងសារធាតុទាំងអស់នោះ។
ចំណែកជំងឺហឺត គឺជាការត្បៀតផ្លូវដង្ហើម ជាពិសេសទៅលើទងសួត ដែលអាចកើតមានឡើង ហើយបាត់ទៅវិញ។ តែវាអាចកើតមានឡើងជាញឹកញាប់។ នៅពេលត្បៀតទងសួតនេះ វាអាចឲ្យមានរោគសញ្ញា ដូចជា តឹងទ្រូង ក្អក ជាដើម។ វាអាចកើតមានញឹកញាប់ ជាពិសេសលើកុមារ។
លោកវេជ្ជបណ្ឌិត បន្តថា សារធាតុ ដែលជំរុញឲ្យមានអាលែកហ្ស៊ី ដូចជា នៅក្នុងខ្យល់ ធូរលី សត្វល្អិតមួយចំនួន ឬក៏រោមសត្វជាដើម។ ដូច្នេះសារធាតុទាំងអស់នេះ វាអាចបង្កជាជំងឺអាលែកហ្ស៊ី ហើយក៏អាចបង្កជាជំងឺហឺតដែរ។ ក្រៅពីនេះ ជំងឺអាលែកហ្ស៊ី ក៏ទាក់ទងនឹងចំណីអាហារ ហើយក៏ទាក់ទងនឹងប្រតិកម្មនៅលើស្បែកដែរ។ ដូច្នេះអាលែកហ្ស៊ី និងជំងឺហឺត តែងតែកើតជាមួយគ្នា។ អាលែកហ្ស៊ី និងជំងឺហឺត អាចជាជំងឺតំណពូជ តែមិនមែនជាជំងឺឆ្លងនោះទេ។
កត្តា ដែលធ្វើឲ្យមានជំងឺអាលែកហ្ស៊ី៖
១-ធូរលី
២-សត្វល្អិត
៣-លម្អងផ្កា
៤-រោមសត្វ ( ឆ្កែ ឆ្មា )
រោគសញ្ញាជំងឺអាលែកហ្ស៊ី៖
១-កើតនៅលើស្បែក
២-ផ្លូវរំលាយអាហារ
៣-ផ្លូវដង្ហើម
រោគសញ្ញា ហឺត៖
១-ក្អក
២-ហត់
៣-ថប់ពិបាកដកដង្ហើម ពិសេសនៅពេលយប់
ផលវិបាកនៃជំងឺហឺត៖
១-រំខានដល់ការរៀនសូត្រ
២-សួតវិវឌ្ឍន៍ទៅធ្ងន់ធ្ងរ កុមារនឹងក្អកហត់រ៉ាំរ៉ៃ ហើយអាចបន្តដល់ធំពេញវ័យ
៣-បើធ្ងន់ធ្ងរ អាចនឹងឲ្យកុមារស្លាប់
លោកវេជ្ជបណ្ឌិត បន្តថា ជំងឺហឺត កើតលើកុមារ តាំងពីក្មេងតូចៗ ហើយភាគច្រើន ក្រោមអាយុ ៥ឆ្នាំ។ ហឺត ក៏អាចកើតដល់មនុស្សចាស់ដែរ។ ជំងឺហឺត មិនអាចព្យាបាលឲ្យជាដាច់ទេ។ តែយើងអាចគ្រប់គ្រងជំងឺនេះបាន ហើយកុមារអាចរស់នៅធម្មតា ដូចកុមារដទៃទៀត ដោយកុមារអាចទៅរៀនសូត្របាន ហើយហាត់កីឡាបានជាធម្មតា។
របៀបព្យាបាល ត្រូវឲ្យកុមារ ធូរស្រាល និងបាត់ហត់ ហើយប្រើប្រាស់ថ្នាំលេបខ្លះ និងថ្នាំហិត ឬឆ្ពុង។ អាណាព្យាបាល ឪពុកម្តាយ ត្រូវយកកូន មកមន្ទីរពេទ្យ មិនមែនចាំដល់កុមារហត់ដង្ហក់ ហើយត្រូវចូលសង្គ្រោះបន្ទាន់នោះទេ។
ដើម្បីបង្ការជំងឺអាលែកហ្ស៊ី និងជំងឺហឺត លោកវេជ្ជបណ្ឌិត គឹម អាង បានណែនាំឲ្យថែរក្សាកូន ចាប់តាំងពីកើត គឺត្រូវបំបៅកូននឹងទឹកដោះម្តាយ ដែលអាចការពារកូនពីអាលែកហ្ស៊ី។ កាត់បន្ថយធូរលី ក្នុងផ្ទះ។ កត្តុតា ដែលធ្វើពីរោមសត្វ រួមទាំងផ្សែងធូប និងផ្សែងបារី ដែលគ្រោះថ្នាក់ដល់អ្នកមានជំងឺអាលែកហ្ស៊ី និងជំងឺហឺត។ បន្ទប់គេង ក៏ត្រូវឲ្យមានខ្យល់អាកាស ចេញចូលផងដែរ។
សូមបញ្ជាក់ថា មន្ទីរពេទ្យកុមារជាតិ គឺជាមន្ទីរពេទ្យរដ្ឋ នៅក្នុងរាជធានីភ្នំពេញ ដែលបានប្រើប្រាស់កម្មវិធីពេទ្យយើង។ កម្មវិធីពេទ្យយើង បង្កើតដោយក្រុមហ៊ុន ហ្វឺស វីម៉ិនថេក អេស៊ា ជាប្រព័ន្ធគ្រប់គ្រងមន្ទីរពេទ្យឌីជីថលដំបូងគេនៅកម្ពុជា ដើម្បីចូលរួមចំណែកកសាងប្រព័ន្ធសុខាភិបាលទំនើប បែបឌីជីថល នៅកម្ពុជា និងសម្រាប់សហគមន៍អាស៊ាន តាមរយៈការផ្តល់សុវត្ថិភាពដល់កំណត់ត្រាព្យាបាល ទិន្នន័យសុខភាពអ្នកជំងឺ និងជួយឲ្យគ្លីនិក និងមន្ទីរពេទ្យដៃគូដំណើរការរលូន និងពុំមានការរំខាន៕
រក្សាសិទ្ធិ©ដោយ៖ ពេទ្យយើង