ជំងឺបាក់ទឹកចិត្ត ជាជំងឺ ដែលត្រូវការសង្គ្រោះបន្ទាន់
ក្នុងកម្មវិធី «សន្ទនាអំពីសុខភាព» របស់ពេទ្យយើង លោកសាស្ត្រាចារ្យ យឹម សុបុត្រា ឯកទេស វិកលវិទ្យានៃមន្ទីរសម្រាកព្យាបាលផ្លូវចិត្ត សាន់ រ៉ាយ បានលើកឡើងថា ជំងឺបាក់ទឹកចិត្ត ជាជំងឺដែលត្រូវការការសង្គ្រោះបន្ទាន់ផ្នែកសុខភាពផ្លូវចិត្ត។ មូលហេតុ ដោយសារតែអ្នកជំងឺបាក់ទឹកចិត្ត បើដល់សភាពធ្ងន់ធ្ងរ អាចឈានដល់ការធ្វើអត្តឃាត ហើយអាចធ្វើមនុស្សឃាតទៀតផង។ កន្លងមក យើងឃើញហើយ អ្នកធ្វើអត្តឃាត ដោយលោតទឹកពីលើស្ពាន ដោយចងក លេបថ្នាំសម្លាប់ខ្លួន ហើយខ្លះ ក៏យកកាំភ្លើងបាញ់សម្លាប់ រួមទាំងមនុស្សឃាត ដោយសម្លាប់លើសមាជិកគ្រួសារ មានទាំងកូន មានទាំងប្រពន្ធ មុននឹងសម្លាប់ខ្លួនឯង។
លោកវេជ្ជបណ្ឌិត យឹម សុបុត្រា លើកឡើងថា សុខភាពផ្លូវចិត្ត ក៏សំខាន់ដូចសុខភាពផ្លូវកាយដែរ។ សុខភាពផ្លូវចិត្ត កើតឡើង ដោយកត្តា ៣សំខាន់៖ ១-កត្តាសង្គម ២-កត្តាជីវសាស្ត្រ (ការប្រែប្រួលអ័រមូន ហ្សែន តំណពូជ) គ្រឿងស្រវឹង និងគ្រឿងញៀន និង៣-កត្តាចិត្តសាស្ត្រ។
លោកវេជ្ជបណ្ឌិត បន្ថែមថា ប្រទេសកាន់តែជឿនលឿន ស្ថានភាពផ្លូវចិត្ត កាន់តែមានបញ្ហាច្រើន។ មូលហេតុ ដោយសារតែការប្រឡងប្រណាំង ការដេញតាមតិចណូឡូជី ឬក៏ការដេញតាមភាពស៊ីវិល័យហ៊ឺហា។ យើងឃើញហើយ រាល់ថ្ងៃនេះ មនុស្សយើងខ្លះ រស់នៅមិនមានហេតុផល ដោយមិនដឹងថា ហេតុ កើតពីអ្វីទេ? តែគាត់ត្រូវទទួលផលបែបហ្នឹង។ ឃើញគេមានឡានទំនើប រ៉ូរ៉ូយ ឃើញគេមានពេជ្រស្វារ៉េ និងឃើញគេមានវីឡា ក៏គិតថា ខ្លួនត្រូវមានដូចគេដែរ។ ដល់ពេលមិនបានដូចការចង់បាននោះ ក៏ឈឺចិត្ត កើតជាជំងឺបាក់ទឹកចិត្ត។
លោកវេជ្ជបណ្ឌិត យឹម សុបុត្រា កត់សម្គាល់ថា សុខភាពផ្លូវចិត្តជារឿងសំខាន់ ដែលទាមទារឲ្យមានការយកចិត្តទុកដាក់។ អ្នកជំងឺ និងក្រុមគ្រួសារ ត្រូវប្រញាប់ទៅជួបគ្រូពេទ្យជំនាញ ដើម្បីពិនិត្យព្យាបាលឲ្យទាន់ពេលវេលា។ ក្នុងគ្រួសារ មិនមានសុភមង្គលទេ បើសិនជាមានអ្នកជំងឺបាក់ទឹកចិត្ត។
ការព្យាបាល ត្រូវធ្វើទៅតាមមូលហេតុនៃការបង្កឲ្យមានជំងឺបាក់ទឹកចិត្ត។ ជួបគ្រូពេទ្យជំនាញ ហើយត្រូវលើកទឹកចិត្តខ្លួនឯង ស្តាប់ព្រះធម៌ កុំគិតច្រើន និងឈប់ទទួលទានគ្រឿងស្រវឹង ជាដើម។ ការព្យាបាលជំងឺបាក់ទឹកចិត្ត ត្រូវការពេលវេលាពី ១ឆ្នាំកន្លះ ទៅ ២ឆ្នាំ។
លោកវេជ្ជបណ្ឌិត យឹម សុបុត្រា បានលើកទឹកចិត្តដល់អ្នកជំងឺបាក់ទឹកចិត្តថា កុំខ្លាច ឬញញើតញញើមនឹងនិយាយរឿងរ៉ាវក្នុងចិត្ត ប្រាប់គ្រូពេទ្យ ឬអ្នកជិតស្និទ្ធបំផុត ព្រោះកាលណាយើងទុករឿងទាំងឡាយ នៅក្នុងខួរក្បាល នោះហើយធ្វើឲ្យសមត្ថភាពខួរក្បាលចុះខ្សោយ ហើយការគិត ការចងចាំក៏ថយចុះ រីឯអារម្មណ៍ ក៏ប្រែប្រួល ក្លាយជាបញ្ហាជំងឺបាក់ទឹកចិត្ត។
សូមបញ្ជាក់ថា មន្ទីរសម្រាកព្យាបាលផ្លូវចិត្ត សាន់ រ៉ាយ គឺជាមន្ទីរពេទ្យឯកជន នៅក្នុងរាជធានីភ្នំពេញ ដែលបានប្រើប្រាស់កម្មវិធីពេទ្យយើង។ កម្មវិធីពេទ្យយើង បង្កើតដោយក្រុមហ៊ុន ហ្វឺស វីម៉ិនថេក អេស៊ា ជាប្រព័ន្ធគ្រប់គ្រងមន្ទីរពេទ្យឌីជីថលដំបូងគេនៅកម្ពុជា ដើម្បីចូលរួមចំណែកកសាងប្រព័ន្ធសុខាភិបាលទំនើប បែបឌីជីថល នៅកម្ពុជា និងសម្រាប់សហគមន៍អាស៊ាន តាមរយៈការផ្តល់សុវត្ថិភាពដល់កំណត់ត្រាព្យាបាល ទិន្នន័យសុខភាពអ្នកជំងឺ និងជួយឲ្យគ្លីនិក និងមន្ទីរពេទ្យដៃគូដំណើរការរលូន និងពុំមានការរំខាន៕
រក្សាសិទ្ធិ©ដោយ៖ ពេទ្យយើង