ក្រួសក្នុងតម្រងនោម
ក្នុងកម្មវិធីសន្ទនាអំពីសុខភាពរបស់ពេទ្យយើង លោកវេជ្ជបណ្ឌិត ឯក ចាន់ប៊ុនថា ឯកទេសផ្នែកសល្យសាស្ត្រប្រព័ន្ធទឹកម៉ូត្រ (តម្រងនោម) នៃមន្ទីរសម្រាកព្យាបាល អ៊ិនដ្រា បានលើកបង្ហាញពីជំងឺក្រួសក្នុងតម្រងនោម។ តម្រងនោម ជាសរីរាង្គគូ មានរាង និងទំហំ ប្រៀបដូចជាគ្រាប់សណ្តែក ស្ថិតនៅខាងក្រោយនៃឆ្អឹងចង្កេះទាំងសង្ខាង នៅត្រង់ឆ្អឹងជំនីទី១២ ដែលខ្មែរយើង ហៅថា កន្លែងកណ្តៀតក្អម គឺនៅខាងឆ្វេង និងខាងស្តាំ។ តម្រងនោម មានមុខនាទី ក្នុងការចូលរួមផលិតទឹកនោម និងបញ្ចេញនូវសារជាតិកាកសំណល់សារពាង្គកាយ បន្ទាប់ពីប្រើប្រាស់ហើយ។
តម្រងនោម មានការតភ្ជាប់នឹងប្លោកនោម ដោយបង្ហូរទឹកនោម។ ក្រួស អាចកើតមាននៅក្នុងតម្រងនោម បង្ហូរទឹកនោម និងនៅក្នុងប្លោកនោម។ តែជាទូទៅ ឲ្យតែមានក្រួស គឺគេតែងតែថា ក្រួសក្នុងតម្រងនោម។ តម្រងនោម ឬក្រលៀន គឺតែមួយទេ។
មូលហេតុ កើតជំងឺក្រួសក្នុងតម្រងនោម៖
១-កើតពីកំណើត
២-លើសសារជាតិកាល់ស្យូម
៣-រលាកក្នុងតម្រងនោម
៤-លើសសារជាតិអាស៊ីតអ៊ុយរិក
៥-កត្តាចំណីអាហារ ពិសេសការទទួលទានទឹកមិនស្អាត និងមានជាតិកំបោរច្រើន។ គ្រឿងក្នុងសត្វ និងសាច់ច្រើន។
៦-ទទួលទានទឹកតិច មិនគ្រប់គ្រាន់
៧-ឈឺបត់ជើងតូច មិនបន្ទោរបង់
៨-ស្ទះផ្លូវបង្ហូរទឹកនោម
៩-រីកក្រពេញប្រូស្តាត
លោកវេជ្ជបណ្ឌិត ឯក ចាន់ប៊ុនថា លើកឡើងថា មិនថា ស្ត្រី ឬបុរសទេ កើតជំងឺក្រួសក្នុងតម្រងនោមដូចគ្នា ហើយច្រើនកើតលើមនុស្សវ័យ ១៨ឆ្នាំឡើង រហូតដល់អាយុ ៧០ឆ្នាំ ទៅ ៨០ឆ្នាំ។
រោគសញ្ញា៖
១-ចុកតម្រងនោម ប្រៀបដូចស្ត្រីឈឺពោះកើតកូន ដោយចុកលីញចង្កេះ បើមានក្រួសខាងឆ្វេង ចុកខាងឆ្វេង ហើយបើមានក្រួសនៅតម្រងនោមខាងស្តាំ គឺចុកខាងស្តាំ
២-ការរលាក ដូចជា ក្តៅខ្លួន រងា រោយចង្កេះ នោមញឹក នោមក្រហាយ នោមក្តៅ ហើយទឹកនោមស ល្អក់ មានកករ
លោកវេជ្ជបណ្ឌិត បន្តថា ជំងឺក្រួសតម្រងនោម បើមិនបានព្យាបាល ឲ្យបានទាន់ពេលវេលាទេ នោះនឹងធ្វើឲ្យអ្នកជំងឺ មានបញ្ហាតម្រងនោម ឬក្រលៀន ដូចជា ពុលមេរោគក្នុងឈាម ឬក៏ច្រាលទឹកនោម ដែលធ្វើឲ្យរលាកតម្រង់នោម ហើយទឹកនោម មានជាខ្ទុះ ហើយចុះខ្សោយមុខងារតម្រងនោម ធ្វើឲ្យកើតជំងឺលើសឈាម និងគ្រាប់ឈាមក្រហមមិនគ្រប់ ជាដើម។
ការព្យាបាល បែងចែកជា ២៖ ១-ព្យាបាលមុខងារតម្រងនោម និង២-ព្យាបាលមូលហេតុនៃជំងឺ។ គ្រូពេទ្យ ត្រូវពិនិត្យព្យាបាល ដោយវិនិច្ឆ័យរោគសញ្ញាឲ្យបានច្បាស់លាស់ គឺទី១ ត្រូវព្យាបាលលើការចុះខ្សោយនៃមុខងារតម្រងនោម ហើយទី២ ទើបឈានទៅព្យាបាលលើមូលហេតុនៃជំងឺ គឺយកក្រួសចេញពីតម្រងនោមតែម្តង។
បច្ចេកទេសនៃការយកក្រួសចេញ ពីមុន គឺប្រើប្រាស់ដោយការវះកាត់ ពុះតម្រងនោម យកក្រួសចេញ។ តែប្រឈមនឹងការហូរឈាម ការឈឺចាប់ និងប្រើពេលយូរទម្រាំតែជាសះស្បើយ។ តែពេលនេះ បច្ចេកវិទ្យាទំនើប គឺព្យាបាលតាមរយៈការឆ្លុះបំបែកយកក្រួសចេញ ប្រើពន្លឺឡាស៊ែរ ដោយមិនចាំបាច់វះកាត់ ដោយអ្នកជំងឺចំណាយពេលសម្រាកពេទ្យតែ ២៤ម៉ោង ទៅ ៤៨ម៉ោងប៉ុណ្ណោះ ហើយអាចធ្វើការងារធម្មតាឡើងវិញ។
លោកវេជ្ជបណ្ឌិត លើកឡើងថា ការព្យាបាលជំងឺក្រួសក្នុងតម្រងនោមរួចហើយ មិនថា តាមរយៈការវះកាត់ ឬក៏តាមការឆ្លុះបំបែកយកក្រួសចេញទេ គឺអ្នកជំងឺ អាចនឹងកើតក្រួសក្នុងតម្រងនោមឡើងវិញ។ ដូច្នេះអ្នកជំងឺ ត្រូវញ៉ាំទឹកស្អាត ឲ្យបានគ្រប់គ្រាន់ ឲ្យបានច្រើន រួមទាំងចំណីអាហារមួយចំនួន កុំឲ្យលើសជាតិអាស៊ីត តាមរយៈការញ៉ាំជាតិសាច់ច្រើន ហើយត្រូវបត់ជើងតូច ដោយកុំទ្រាំ។ បើមានបញ្ហាតម្រងនោម ត្រូវទៅជួបគ្រូពេទ្យជំនាញ ដើម្បីពិនិត្យ និងពិគ្រោះយោបល់។
លោកវេជ្ជបណ្ឌិត ឯក ចាន់ប៊ុនថា បានផ្តាំផ្ញើជូនបងប្អូនប្រជាពលរដ្ឋថា បើឈឺ មិនថាជំងឺអ្វីទេ ពិសេសសង្ស័យថា ជាជំងឺក្រួសក្នុងតម្រងនោម ត្រូវជួបគ្រូពេទ្យឯកទេសត្រឹមត្រូវ ដើម្បីពិនិត្យព្យាបាល ដោយមិនត្រូវទៅទិញថ្នាំផ្សំ ដោយចិត្តឯង ឬលឺតាមគ្នា នៅហ្វាម៉ាស៊ីនោះទេ។
សូមបញ្ជាក់ថា មន្ទីរសម្រាកព្យាបាល អ៊ិនដ្រា គឺជាមន្ទីរពេទ្យឯកជន នៅក្នុងរាជធានីភ្នំពេញ ដែលបានប្រើប្រាស់កម្មវិធីពេទ្យយើង។ កម្មវិធីពេទ្យយើង បង្កើតដោយក្រុមហ៊ុន ហ្វឺស វីម៉ិនថេក អេស៊ា ជាប្រព័ន្ធគ្រប់គ្រងមន្ទីរពេទ្យឌីជីថលដំបូងគេនៅកម្ពុជា ដើម្បីចូលរួមចំណែកកសាងប្រព័ន្ធសុខាភិបាលទំនើប បែបឌីជីថល នៅកម្ពុជា និងសម្រាប់សហគមន៍អាស៊ាន តាមរយៈការផ្តល់សុវត្ថិភាពដល់កំណត់ត្រាព្យាបាល ទិន្នន័យសុខភាពអ្នកជំងឺ និងជួយឲ្យគ្លីនិក និងមន្ទីរពេទ្យដៃគូដំណើរការរលូន និងពុំមានការរំខាន៕
រក្សាសិទ្ធិ©ដោយ៖ ពេទ្យយើង