ជំងឺរបស់ស្ត្រី ៧ប្រភេទ ដែលបុរស មិនអាចជៀសផុត

ដោយសារភាពខុសគ្នានៃហ្សែន ស្ត្រី និងបុរស អាចប្រឈមនឹងជំងឺខុសគ្នាៗ មួយចំនួន។ ជំងឺខ្លះ វាយប្រហារខ្លាំងទៅលើស្ត្រី ជាងបុរស។ ប៉ុន្តែហានិភ័យនៃការឆ្លងជំងឺរបស់ស្ត្រី នៅតែអាចកើតមានលើបុរស​។

ខាងក្រោមនេះ ជាប្រភេទជំងឺរបស់ស្ត្រី ដែលអាចកើតមានលើបុរស៖

១. ជំងឺពុកឆ្អឹង៖ ស្ត្រីប្រឈមនឹងបញ្ហាពុកឆ្អឹងញឹកជាងបុរស ដោយសារបញ្ហាអស់រដូវ។ ស្ត្រីម្នាក់ក្នុងចំណោមស្ត្រី ៣នាក់ មានជំងឺពុកឆ្អឹង ខណៈដែលបុរសម្នាក់ ក្នុង ៥នាក់ ក៏កើតមានដូចគ្នា។ បុរស ដែលមានអាយុប្រហែល ៦៥ឆ្នាំ ទៅ ៧០ឆ្នាំ អាចបាត់បង់ម៉ាសឆ្អឹងស្មើនឹងស្ត្រីដែរ។

២. ជំងឺមហារីកសុដន់៖ ជំងឺមហារីកសុដន់ កើតឡើងលើបុរស ១% នៃជំងឺមហារីកសុដន់ទាំងអស់។ ជាពិសេសបុរស ដែលមានអាយុលើ ៥០ឆ្នាំ មានសញ្ជាតិ​អាហ្វ្រិកកាត់អាមេរិក ឬអ្នក​លើសទម្ងន់ ងាយប្រឈម​បំផុត។

៣. បញ្ហាក្រពេញទីរ៉ូអ៊ីត៖ ស្ត្រីអាចកើតមានបញ្ហានេះ លើសបុរសដល់ទៅ ៥ ទៅ ៨​ដង ប៉ុន្តែបុរស​នៅតែ​មិនអាចជៀសផុត​នឹងបញ្ហានេះឡើយ។

៤. បញ្ហាមិនប្រក្រតីនៃការទទួលទាន៖ មនុស្សប្រុសប្រឈមនឹងបញ្ហាតមអាហារ ឬអត់ឃ្លានត្រឹមតែ ១០ ទៅ ១៥%ប៉ុណ្ណោះ ប៉ុន្តែមនុស្សប្រុសជាមនុស្ស ដែលមិនងាយស្វែងរកការព្យាបាលនោះទេ។​ កត្តានេះ ធ្វើឲ្យបុរសប្រឈមនឹងបញ្ហាធ្ងន់ធ្ងរ ដូចជា បញ្ហាបេះដូង ការបាត់បង់ឆ្អឹង កំហូចសរីរាង្គ ឬឈានដល់ការបាត់បង់ជីវិត។

៥. ការឆ្លងរោគក្នុងប្លោកនោម៖ វាកើតឡើងញឹកញាប់លើស្ត្រី ប៉ុន្តែបុរស ដែលមានក្រពេញប្រូស្តាតរីកធំ គ្រួសក្នុងតម្រងនោម ឬការរួមតូចនៃបង្ហួរនោម ងាយនឹងប្រឈមនឹងបញ្ហានេះណាស់។ បុរសអាចជួបរោគសញ្ញា ​ដូចជា នោមញឹក ទឹកនោមមានពពុះ ទឹកនោមមានឈាម ចំណង់នោមខ្លាំង ក្ដៅរលាកនៅពេលនោម ឬក្ដៅខ្លួនតិចតួច។

៦. ជំងឺបាក់ទឹកចិត្ត៖ ស្ត្រីកើតមានជំងឺនេះ ច្រើនជាងបុរសដល់ទៅ ២ដង ប៉ុន្តែរោគសញ្ញាមានភាពខុសគ្នាបន្តិចបន្តួច។ ស្ត្រីអាចមានអារម្មណ៍មិនសប្បាយចិត្ត ឬឧស្សាហ៍យំ ចំណែកឯបុរសងាយនឹង​បញ្ចេញកំហឹង មានអារម្មណ៍រំខាន ខកចិត្ត ឬអស់សង្ឃឹម ជាដើម។

៧. ជំងឺលុយពីស៖ ៩០% នៃអ្នកកើតជំងឺលុយពីស ជាស្ត្រី។ បុរសក៏អាចកើតមានផងដែរ ហើយវាមានរោគសញ្ញា ដូចជា ឈឺហើមសន្លាក់ ខ្សោយសាច់ដុំ ខ្សោយកម្លាំងរ៉ាំរ៉ៃ ក្ដៅខ្លួនដោយគ្មានមូលហេតុ ជ្រុះសក់ ហើមជើង ហើមភ្នែក ពងមាត់ ឡើងកូនកណ្តុរ​ និងកន្តួលក្រហមរាងមេអំបៅលើ​ខ្ទង់ច្រមុះ និង​ថ្ពាល់​៕

ប្រភព៖ Healthline II https://www.healthline.com/

រក្សាសិទ្ធិ©ដោយ៖ ពេទ្យយើង