ជំងឺដុំគីស ក្នុងសុដន់
លោកវេជ្ជបណ្ឌិត ប៊ុន សុវណ្ណា ឯកទេសសម្ភព រោគស្ត្រី និងជាស្ថាបនិក ព្រមទាំងជានាយកប្រតិបត្តិនៃមន្ទីរពហុព្យាបាល សុវណ្ណ បានលើកឡើងក្នុងកម្មវិធី សន្ទនាអំពីសុខភាព របស់ពេទ្យយើង ថា ជំងឺដុំគីសក្នុងសុដន់ ជាជំងឺ ដែលកើតនៅក្នុងក្រពេញរបស់សុដន់។ គីសក្នុងសុដន់ មាន ២ប្រភេទ គឺប្រភេទធម្មតា និងប្រភេទស្មុគស្មាញ ដែលមានការវិវត្ត ទៅជាជំងឺមហារីក។
ដុំគីសមានលក្ខណៈ ដូចដុំសាច់ដែរ។ ជាទូទៅ គីសក្នុងសុដន់ ជាជំងឺស្លូត ហើយអាចវិវត្តទៅជាមហារីក មានតិចបំផុត។
មូលហេតុ បណ្តាលឲ្យកើតមានជំងឺដុំគីសក្នុងសុដន់៖
ជំងឺដុំគីសក្នុងសុដន់ អាចកើតឡើងដោយសារវិបត្តិនៃអ័រមូនរបស់ស្ត្រី ហើយចាប់តាំងពីពេញវ័យ រហូតដល់ស្ត្រីអស់រដូវ អាចមានឱកាសក្នុងការកើតជំងឺនេះ។ ជំងឺដុំគីសក្នុងសុដន់ ភាគច្រើនគេឃើញកើតលើស្ត្រី ក្នុងរង្វង់អាយុ ៣៥ឆ្នាំ រហូតទៅដល់ ៥០ឆ្នាំ ហើយជាស្ត្រី ដែលមករដូវមិនទៀងទាត់។
រោគសញ្ញានៃជំងឺដុំគីសក្នុងសុដន់៖
១-ឈឺសុដន់ស្ទុំៗ
២-ឡើងពកលើស្បែក
៣-សុដន់ មានភាពមិនស្មើគ្នា
ការពិនិត្យ និងព្យាបាល៖
១-ស្ត្រីត្រូវសង្កេតមើលសុដន់របស់ខ្លួន នៅមុខកញ្ចក់ តើមានភាពខុសពីប្រក្រតី ឬទេ?
២-ស្ត្រីអាចស្ទាបសុដន់ រកដុំគីសដោយខ្លួនឯង
៣-ស្ត្រីត្រូវទៅជួបគ្រូពេទ្យជំងឺជំនាញ
លោកវេជ្ជបណ្ឌិត ប៊ុន សុវណ្ណា បន្ថែមថា សម្រាប់ស្ត្រី នៅពេលមានភាពមិនប្រក្រតីណាមួយ ត្រូវតែទៅជួបគ្រូពេទ្យជំនាញ។ តាមរយៈការពិនិត្យរបស់គ្រូពេទ្យ ពេទ្យអាចធ្វើការវិនិច្ឆ័យ បែងចែកថា តើវាជាដុំគីសនោះ ជាប្រភេទស្លូត ឬក៏ជាដុំគីស ដែលមានហានិភ័យ អាចវិវត្តទៅជាមហារីក។ ដូច្នេះប្រសិនបើគ្រូពេទ្យ មានការសង្ស័យថា គីសនោះ អាចមានហានិភ័យមិនល្អ គ្រូពេទ្យ នឹងស្នើសុំបូមយកទឹក នៅក្នុងគីសនោះ ដើម្បីធ្វើការវិភាគ ឬមួយក៏គ្រូពេទ្យ នឹងណែនាំឲ្យធ្វើការវះកាត់យកដុំសាច់នោះចេញ ពីព្រោះយើងទុកវាទៅ វាអាចបង្កហានិភ័យបាន។
លោកវេជ្ជបណ្ឌិត ប៊ុន សុវណ្ណា បញ្ជាក់ថា ហានិភ័យនៃគីសសុដន់ មិនធ្ងន់ធ្ងរដូចជាដុំសាច់ទេ។ គ្រូពេទ្យតែងតែធ្វើការវិនិច្ឆ័យ ដោយប្រាកដប្រជាថា ដុំគីសនោះ មានទំហំប៉ុណ្ណា ហើយមានការវិវត្តមិនល្អ ឬទេ? ប្រសិនបើដុំនោះ មានទំហំតូច យើងនឹងពន្យល់ឲ្យគាត់រក្សាទុក ហើយប្រាប់គាត់ថា ជាដុំស្លូតទេ មិនមានហានិភ័យទេ តែគាត់ក៏ត្រូវស្ថិតនៅក្នុងការតាមដានសុដន់នោះដែរ។ មានន័យថា គាត់ត្រូវពិនិត្យរៀងរាល់ ៦ខែម្តង ឬរៀងរាល់ឆ្នាំ។
ចំណែកឯដុំគីស
ដែលពិនិត្យហើយ មានលក្ខណៈ
ធំ យើងនឹងណែនាំឲ្យគាត់វះយកចេញ ព្រោះបើទុកវា វាអាចមានហានិភ័យ ទោះបីជាកម្រិតតិចតួចក៏ដោយ ហើយវាក៏អាចប៉ះពាល់ដល់អាយុជីវិតរបស់គាត់ បើសិនជាវាវិវត្តទៅដល់ជំងឺមហារីក។ ម្យ៉ាងទៀត បើគាត់ទុកទៅ វាអាចនឹងប៉ះពាល់ដល់ផ្លូវចិត្តរបស់គាត់។
លោកវេជ្ជបណ្ឌិត ប៊ុន សុវណ្ណា បន្តថា ក្រោយការព្យាបាល ពេលខ្លះ ក៏អាចកកើតឡើងវិញ នូវដុំគីស នៅក្បែរកន្លែង ដែលយើងវះយកចេញនោះដែរ។ មួយវិញទៀត នៅពេលដែលវះកាត់យកដុំគីសចេញ អាចនឹងមានស្លាកស្នាម។ ដូច្នេះក្រោយព្យាបាលហើយ ស្ត្រីនៅតែត្រូវស្ថិតក្រោមការតាមដានរបស់គ្រូពេទ្យ ហើយអាចរៀងរាល់ ១ឆ្នាំម្តង។
វិធីការពារ៖
ស្ត្រីត្រូវតាមដានពិនិត្យសុខភាពខ្លួន ពិសេសត្រូវស្វែងយល់ពីសុដន់ និងពិនិត្យសុដន់ដោយខ្លួនឯង ដែលអាចឲ្យគាត់រកឃើញនូវជំងឺសុដន់។
លោកវេជ្ជបណ្ឌិត ប៊ុន សុវណ្ណា បញ្ជាក់បន្ថែមថា ជាទូទៅ ស្ត្រីបើមិនមានរោគសញ្ញា ឬការឈឺចាប់ទេ នោះគាត់មិនចាប់អារម្មណ៍ទេ។ តែជំងឺមហារីក ចាប់ផ្តើមពីដុំមួយ ដែលមិនឈឺចាប់។ ដូច្នេះបើសិនជាស្ត្រីពិនិត្យ ស្ទាបសុដន់ ហើយរកឃើញមានដុំសាច់អ្វីមួយនោះ សូមទៅជួបគ្រូពេទ្យ ដើម្បីពិនិត្យ និងពិគ្រោះយោបល់។
សូមបញ្ជាក់ថា មន្ទីរពហុព្យាបាល សុវណ្ណ គឺជាមន្ទីរពេទ្យឯកជន ស្ថិតនៅខេត្តបាត់ដំបង ដែលបានប្រើប្រាស់កម្មវិធីពេទ្យយើង។ កម្មវិធីពេទ្យយើង បង្កើតដោយក្រុមហ៊ុន ហ្វឺស វីម៉ិនថេក អេស៊ា ជាប្រព័ន្ធគ្រប់គ្រងមន្ទីរពេទ្យឌីជីថលដំបូងគេនៅកម្ពុជា ដើម្បីចូលរួមចំណែកកសាងប្រព័ន្ធសុខាភិបាលទំនើប បែបឌីជីថល នៅកម្ពុជា និងសម្រាប់សហគមន៍អាស៊ាន តាមរយៈការផ្តល់សុវត្ថិភាពដល់កំណត់ត្រាព្យាបាល ទិន្នន័យសុខភាពអ្នកជំងឺ និងជួយឲ្យគ្លីនិក និងមន្ទីរពេទ្យដៃគូដំណើរការរលូន និងពុំមានការរំខាន៕
រក្សាសិទ្ធិ©ដោយ៖ ពេទ្យយើង