ជំងឺពពែភ្នែក
លោកសាស្ត្រាចារ្យវេជ្ជបណ្ឌិត គង់ ពិសិដ្ឋ ឯកទេសចក្ខុរោគ នៃមន្ទីរពេទ្យភ្នែក ដុកទ័រ គង់ ពិសិដ្ឋ នៅក្នុងកម្មវិធីសន្ទនាអំពីសុខភាព របស់ពេទ្យយើង បានលើកឡើងថា ពពែភ្នែក ច្រើនកើតលើក្មេង និងមនុស្សជំទង់។ វាធ្វើឲ្យត្របកភ្នែករបស់យើងហើម ហើយពក ជាពិសេសពេលវាធ្វើសកម្មភាពខ្លាំង ធ្វើឲ្យហើមត្របកភ្នែកខាងលើ ឬខាងក្រោម។ អាចកើតមានតំណាលគ្នា ឬក៏អាចឆ្លាស់គ្នា។
មូលហេតុបង្កឲ្យមានជំងឺពពែភ្នែក៖
១-ក្រពេញផលិតខ្លាញ់ រន្ធរបស់វា គឺស្ទះ នាំឲ្យរលាកក្នុងភ្នែកបង្កទៅជាខ្ទុះ
២-កើតឡើងដោយមេរោគ ដោយសារការប៉ះធូលីដី ដៃមិនស្អាត មកញី ឬប៉ះភ្នែក វាធ្វើឲ្យមេរោគ តោងលើរោមភ្នែក ហើយចូលទៅក្នុងរន្ធគល់រោមភ្នែក ឬមួយក៏រន្ធ ដែលបញ្ចេញខ្លាញ់។ ដូច្នេះបង្កទៅជាខ្ទុះ ហើមប៉ោង
វិធីព្យាបាលជំងឺពពែភ្នែក៖
១- បើតិចតួច វាអាចបាត់ទៅវិញដោយខ្លួនឯង ឬមួយក៏ព្យាបាលដោយខ្លួនឯង ប្រសិនណាវាហើមតិចតួច ឬមួយក៏កើតឡើងដោយមិនធ្ងន់ធ្ងរទេ គឺយើងអាចព្យាបាល ដោយខ្លួនឯង ប្រើទឹកក្តៅដាក់កន្សែងស្អំ កុំឲ្យក្តៅពេក ហើយក៏កុំឲ្យត្រជាក់ពេក។ គឺថា ឲ្យអ៊ុនៗ ហើយយើងស្អំទៅលើភ្នែករបស់យើង មួយថ្ងៃ ឲ្យបានម្តង ទៅ ២ដង។ ក្នុង ១ដង ពី ១៥នាទី ទៅ ២០នាទី។
២-សម្អាតភ្នែក សម្អាតគល់រោមភ្នែក ដោយឧស្សាហ៍លុបមុខនឹងទឹកស្អាត ជាពិសេសពេលរៀបគេង ឬក៏នៅពេលគេងហើយ ឬក៏ពេលចេញទៅក្រៅ នៅពេលប៉ះធូលីដី កន្លែងដែលមិនស្អាត។
៣-បើពពែភ្នែក កើតឡើងហើយមានលក្ខណៈ
ធ្ងន់ធ្ងរ ប៉ោងខ្ទុះធំ អ្នកជំងឺត្រូវមកជួបគ្រូពេទ្យ ដើម្បីព្យាបាល។ ពេទ្យនឹងចុះយកខ្ទុះនោះចេញ ហើយព្យាបាល ដោយប្រើថ្នាំបន្តក់ភ្នែក។ បើមិនព្យាបាលទេ វាអាចបែកដោយខ្លួនវាវិញ ហើយវាអាចមានបញ្ហា អាចទៅជាក្រិន ទៅជាគីស ជាដើម។ អ្នកមានពពែភ្នែក ប៉ោងធំ ហើយមិនបែក ក៏អាចបង្កទៅជាគីស។
ដូច្នេះលោកវេជ្ជបណ្ឌិត គង់ ពិសិដ្ឋ លើកឡើងថា នៅពេលអ្នកជំងឺ មានបញ្ហាពពែភ្នែក សូមមកពិនិត្យព្យាបាលជាមួយគ្រូពេទ្យ ដើម្បីជៀសវាងជំងឺផ្សេងៗ ហើយជាពិសេសដើម្បីកុំឲ្យប៉ះពាល់ដល់ត្របកភ្នែក និងក្រពេញ ដែលត្រូវផលិតខ្លាញ់។
លោកវេជ្ជបណ្ឌិត គង់ ពិសិដ្ឋ បញ្ជាក់ថា បើការខូចខាតក្រពេញផលិតខ្លាញ់នេះច្រើន ធ្វើឲ្យភ្នែកយើងស្ងួត។ ដូច្នេះយើងគួរតែការពារ និងអនាម័យត្របកភ្នែកឲ្យស្អាត ហើយយើងអាចព្យាបាលខ្លួនយើងបាន នៅពេលហើមតិចតួច យើងអាចស្អំដោយទឹកក្តៅអ៊ុនៗ ប៉ុន្តែករណីធ្ងន់ធ្ងរ គួរតែមកជួបគ្រូពេទ្យ ដើម្បីពិនិត្យព្យាបាល។ ជំងឺពពែភ្នែក ជាជំងឺ ដែលយើងជួបប្រទះសព្វថ្ងៃច្រើន។ ដូច្នេះយើងត្រូវអនាម័យ និងការពារភ្នែក។
សូមជម្រាបជូនថា មន្ទីរពេទ្យភ្នែក ដុកទ័រ គង់ ពិសិដ្ឋ គឺជាមន្ទីរពេទ្យឯកជនមួយ នៅក្នុងរាជធានីភ្នំពេញ ដែលបានប្រើប្រាស់នូវកម្មវិធី «ពេទ្យយើង»។ កម្មវិធីពេទ្យយើង ជាកម្មវិធីប្រព័ន្ធគ្រប់គ្រងមន្ទីរពេទ្យបែបឌីជីថល ផ្តល់សេវាគ្រប់គ្រងប្រតិបត្តិការ នៅក្នុងស្ថាប័នសុខាភិបាលទាំងរដ្ឋ និងឯកជន។ កម្មវិធីនេះ បង្កើតឡើង ក្នុងគោលបំណងចូលរួមលើកកម្ពស់ការថែរក្សាបរិស្ថាន ទីក្រុងស្អាត តាមរយៈការកាត់បន្ថយប្រើប្រាស់ក្រដាស ការព្រីនឯកសារនានា នៅក្នុងមន្ទីរពេទ្យ និងជាពិសេសនោះ រាល់ប្រតិបត្តិការទាំងអស់ នៅក្នុងស្ថាប័នសុខាភិបាល ត្រូវបានគ្រប់គ្រងដោយប្រព័ន្ធឌីជីថល ដែលផ្តល់សុវត្ថិភាព និងផ្តល់ភាពងាយស្រួលទាំងអ្នកផ្តល់សេវាព្យាបាល និងអ្នកជំងឺ៕
រក្សាសិទ្ធិ©ដោយ៖ ពេទ្យយើង