សុដន់ លេចចេញរូបភាពទាំងនេះ អាចបង្ហាញសញ្ញាមហារីក!
ជំងឺមហារីកសុដន់ កើតមានច្រើន ជាទូទៅលើស្ត្រី ហើយកោសិកាមហារីកសុដន់ ជាកោសិកា ដែលលូតលាស់ខ្លាំង កាចសាហាវ មិនងាយនឹងទប់ទល់នោះទេ។ ទោះបីស្ត្រី ជាក្រុមប្រឈមខ្ពស់ តែបុរសខ្លះ ក៏ជៀសមិនផុតពីហានិភ័យ កើតមហារីកសុដន់នេះដែរ។ ការកត់សម្គាល់ រោគសញ្ញានៅលើសុដន់ ជាវិធី ដែលមានប្រសិទ្ធភាពខ្ពស់មួយ ក្នុងការតាមដានការលូតលាស់រោគសញ្ញានៃជំងឺមហារីកសុដន់ ដើម្បីឱ្យងាយស្រួល ក្នុងការទប់ស្កាត់ និងព្យាបាលបានទាន់ពេល។
ទាំងនេះ ជារូបភាពមួយចំនួន នៅលើសុដន់ ដែលបង្ហាញពីលទ្ធភាពនៃការកើតមានជំងឺមហារីកសុដន់៖
១. មានដុំពក និងដុំសាច់សុដន់ឡើងក្រាស់
ទាំងពីរនេះ ជាសញ្ញាដំបូងបំផុតនៃមហារីកសុដន់ ហើយងាយស្រួលកំណត់សម្គាល់ជាងគេ។ វិធីមួយ ជួយឱ្យអ្នកស្គាល់ពីលក្ខណៈសុដន់របស់ខ្លួនច្បាស់ និងដឹងថា សុដន់មានការប្រែប្រួលបែបណា គឺអ្នកឧស្សាហ៍ពិនិត្យសុដន់របស់ខ្លួន ឱ្យបានយ៉ាងតិចមួយខែម្ដង ដោយខ្លួនឯង ឬកាន់តែល្អ ពិនិត្យជាមួយពេទ្យជំនាញ។
ពេលវេលាល្អបំផុត សម្រាប់ពិនិត្យសុដន់ គឺរយៈពេលប៉ុន្មានថ្ងៃ ក្រោយមករដូវ។ ប្រសិនបើស្ត្រីអស់រដូវ ស្ត្រីគួរកំណត់ថ្ងៃមួយណាជាក់លាក់ សម្រាប់តេស្តមើលឱ្យបានម្ដង ក្នុងមួយខែ។
២. ហូរទឹករំអិលចេញពីក្បាលសុដន់
ការហូរទឹករំអិល ឬទឹកដោះចេញពីចុងសុដន់ អាចគ្រាន់តែជារឿងធម្មតា ប្រសិនបើអ្នកស្ថិតក្នុងដំណាក់កាលបំបៅដោះកូន។ ផ្ទុយទៅវិញ បើអ្នកមិនបំបៅដោះកូននោះទេ តែមានទឹកហូរចេញមក អ្នកមិនគួរមើលរំលងរោគសញ្ញានេះទេ។ នោះអាចជារោគសញ្ញាមហារីកសុដន់ ដែលអាចមានសណ្ឋានជាទឹកថ្លា ឬជាឈាម។
គួរតែជួបគ្រូពេទ្យជំនាញ ដើម្បីពិនិត្យមើលពីមូលហេតុនៃរោគសញ្ញានេះ។
៣. ផ្លាស់ប្ដូរទំហំ និងទម្រង់នៃសុដន់
បើសុដន់ មានការផ្លាស់ប្ដូរទម្រង់ ឬអាចមានការហើម ពេលខ្លះ វាជាសញ្ញានៃការមករដូវធម្មតា។ ប៉ុន្តែប្រសិនបើសុដន់ប្រែប្រួលបែបនេះ ក្នុងពេលដែលស្ត្រី មិនទាំងមានរដូវផង វាអាចជាសញ្ញាមហារីកហើយ។
៤. ចុងសុដន់ លឹបចូលទៅក្នុង ឬចុងសុដន់បញ្ច្រាស់
ការលូតលាស់ នាំមកនូវការប្រែប្រួលរូបរាងសុដន់របស់ស្ត្រី។ ប៉ុន្តែប្រសិនបើមានសញ្ញាគួរឱ្យសង្ស័យបែបនេះ គួរការពារទុកមុន ដោយពិគ្រោះពីបញ្ហាជាមួយដុកទ័រជំនាញភ្លាម។
៥. របបស្បែក ឬសើរស្បែកសុដន់
កុំភ័យខ្លាំងពេក កាលណា មានរោគសញ្ញាទាំងនេះ ព្រោះវាក៏អាចជាសញ្ញាជំងឺសើរស្បែកដែរ។ ក៏ប៉ុន្តែបើចង់ដឹងកាន់តែច្បាស់ សូមពិនិត្យសុខភាពសុដន់ ព្រោះរោគសញ្ញានេះ ក៏ជារោគសញ្ញាមហារីកសុដន់ដូចគ្នា។
៦. ស្នាមកន្តួលលើស្បែកសុដន់
ស្នាមក្រហម ឬកន្តួលលើស្បែក អាចជាសញ្ញានៃបញ្ហារលាកស្បែកសុដន់។ ប្រសិនបើមានសញ្ញាទាំងនេះ គួរតែតេស្តមើលស្ថានភាពសុដន់ ព្រោះនេះអាចជាទម្រង់នៃមហារីកសុដន់ ដែលមានលក្ខណៈកាច។ មហារីកសុដន់ប្រភេទនេះ បង្កផលប៉៉ះពាល់លើស្បែក និងសរសៃកូនកណ្ដុររបស់សុដន់ ដែលបង្កជារោគសញ្ញាកន្តួលក្រហមបែបនេះ។
៧. ស្បែកសុដន់ មានស្នាមអុចៗ ឬខូង
សុដន់ស្ត្រី នៅពេលរលាកហើម អាចមានស្ថានភាពអុចៗ គ្រើមៗ ឬខូងៗ ដូចសំបកក្រូច។ ក្នុងស្ថានភាពនេះ ស្ត្រីត្រូវតែពិនិត្យសុខភាពសុដន់ មិនគួរទុកយូរទេ៕
ប្រភព៖ Healthline https://www.healthline.com/
រក្សាសិទ្ធិ©ដោយ៖ ពេទ្យយើង