ឲ្យតែឈឺ កោសខ្យល់! ក្តៅខ្លួន ក៏កោសខ្យល់! ឈឺក្បាល ក៏កោសខ្យល់! តើការកោសខ្យល់ មានលកណ្ខៈអ្វីពិសេស
ឲ្យតែឈឺ កោសខ្យល់! ក្តៅខ្លួន ក៏កោសខ្យល់! ឈឺក្បាល ក៏កោសខ្យល់! តើការកោសខ្យល់ មានលកណ្ខៈអ្វីពិសេស បានជាបងប្អូនយើង និយមប្រើប្រាស់វិធីសាស្រ្តនេះ?
ការកោសខ្យល់ ជាវិធីសាស្ត្រព្យាបាលជំងឺមួយ ដែលពេញនិយមខ្លាំង សម្រាប់បងប្អូនប្រជាពលរដ្ឋខ្មែរ។ បងប្អូនមានដែលសង្កេតឃើញដែរឬទេ? នៅតាមផ្ទះនិមួយៗ ពេលដែលមាន(១)រោគសញ្ញាក្តៅខ្លួន (២)ឈឺក្បាល (៣)វិលមុខ (៤)ឬក៏សល់ហាយពីការជួបជុំ គឺតែងតែប្រើប្រាស់វិធីសាស្ត្រនេះ! ទៀតសោត វិធីសាស្រ្តនេះ មិនមែនទើបតែនិយមប្រើប្រាស់នាពេលបច្ចុប្បន្ននោះទេ គឺតាំងពីជំនាន់មុនម្លេះ។
តើវិធីសាស្ត្រនៃការព្យាបាលដោយការកោសខ្យល់នេះ មានអត្ថប្រយោជន៍ និងផលប៉ះពាល់អ្វីខ្លះ?
ជាការពិត! វិធីសាស្ត្រកោសខ្យល់មិនត្រឹមតែពេញនិយមសម្រាប់បងប្អូនខ្មែរយើងនោះទេ ប្រទេសជិតខាងយើងក៏ពេញនិយមក្នុងការប្រើប្រាស់ការកោសខ្យល់នេះផងដែរដូចជា៖ ប្រទេសចិន ប្រទេសថៃ វៀតណាម និងឡាវជាដើម។
ការស្រាវជ្រាវពីគេហទំព័រ healthline.com បានបង្ហាញថា វិធីសាស្ត្រកោសខ្យល់នេះ មានដើមកំណើតពីប្រទេសចិន ហើយវិធីសាស្រ្តនេះ ក៏ជាក្បួនបុរាណប្រចាំប្រទេសចិនផងដែរក្នុងការយកមកព្យាបាលជំងឺ។ ការកោសខ្យល់នេះ ជាវិធីព្យាបាលបែបធម្មជាតិ ដោយការកោសស្បែក ជាមួយនិង ឧបករណ៍ម៉ាស្សា ដែលធ្វើឱ្យឈាមរត់ស្រួល និងជាបច្ចេកទេសព្យាបាលបុរាណដែលគេ ជឿជាក់ថា អាចព្យាបាលឈឺចាប់រ៉ាំរ៉ៃបានយ៉ាងមានប្រសិទ្ធិភាព។
យោងតាមការសិក្សាស្រាវជ្រាវដដែល វិធីសាស្រ្តព្យាបាលដោយកោសខ្យល់នេះ ជាទូទៅត្រូវបានអនុវត្តនៅលើខ្នង គូទ ក ដៃ និងជើង ជាដើម។ វិធីសាស្ត្រព្យាបាល ដោយការកោសខ្យល់ អាចកាត់បន្ថយជំងឺ ដែលបណ្តាលឱ្យឈឺចាប់រ៉ាំរ៉ៃ ដូចជា៖
(១)ជំងឺរលាកសន្លាក់
(២)ជំងឺ fibromyalgia
(៣)ក៏ដូចជាជំងឺ ដែលបង្កឱ្យមានការឈឺចាប់សាច់ដុំ និងសន្លាក់។ ក្រៅពីកាត់បន្ថយការឈឺចាប់ដោយជំងឺរ៉ាំរ៉ៃ ការកោសខ្យល់ ក៏អាចកាត់បន្ថយរោគសញ្ញានៃលក្ខខណ្ឌជំងឺផ្សេងទៀត រួមមាន៖
- ជំងឺរលាកថ្លើមប្រភេទ B។ ជំងឺរលាកថ្លើមប្រភេទ B គឺជាការឆ្លងមេរោគ ដែលបណ្តាលឱ្យ (១)រលាកថ្លើម (២)ខូចថ្លើម (៣)និងស្លាកស្នាមថ្លើម។ ការស្រាវជ្រាវបានបង្ហាញថា ការកោសខ្យល់អាចកាត់បន្ថយការរលាកថ្លើមរ៉ាំរ៉ៃ។
- ឈឺក្បាលប្រកាំង។ ការឈឺក្បាលបណ្តាលមកពីកត្តាជាច្រើន ប៉ុន្តែបើសិនបើការឈឺក្បាលរបស់លោកអ្នកមិនឆ្លើយតបនឹងថ្នាំដែលវេជ្ជបញ្ជាបានដាក់ឲ្យនោះទេ លោកអ្នកអាចប្រើប្រាស់វិធីសាសាស្ត្រកោសខ្យល់នេះបាន។
- ការស្ទះទឹកដោះ របស់ម្តាយ ដែលទើបសម្រាលកូនថ្មីៗ។ ស្ថានភាពនេះ គឺស្ត្រីបំបៅដោះកូនជាច្រើន បានជួបប្រទះ គឺនៅពេលដែលសុដន់ម្តាយពោរពេញដោយទឹកដោះច្រើន សុដន់ប្រែជាហើម និងឈឺចាប់ ដែលធ្វើឱ្យទារកពិបាកបំបៅដោះរបស់ម្តាយ។
- ការឈឺក ឬចុកចាប់នៅត្រង់ក។ (១)ការឈឺចុកចាប់នៅតំបន់ក (២)នៅស្មារខាងក្រោយ ឬក៏(៣)អាការៈចុកស្រពន់ រោយក លោកអ្នកក៏អាចសាកល្បងក្នុងការប្រើប្រាស់វិធីសាស្ត្រកោសខ្យល់ បានផងដែរ។
- រោគសញ្ញា Tourette។
ការអស់រដូវរបស់ស្ត្រី។ ការអស់រដូវរបស់ស្ត្រី គឺតែងតែកើតឡើងនៅអាយុ ៤៥ឆ្នាំ ប៉ុន្តែការស្រាវជ្រាវបានឲ្យដឹងថា ប្រសិនបើស្រ្តីប្រើប្រាស់វិធីសាស្ត្រព្យាបាលដោយការកោសខ្យល់នេះ គឺអាចជួយកាត់បន្ថយក្នុងការអស់រដូវបាន ព្រោះវិធីសាស្ត្រនេះ (១)ជួយសម្រួលសសៃរឈាមឲ្យប្រសើរឡើង (២)កាត់បន្ថយការគេងមិនលក់ (៣)ការមករដូវមិនទៀងទាត់ (៤)ការថប់បារម្ភ និង(៥)អស់កម្លាំង។
ក្រោយពីបានស្តាប់ពីអត្ថប្រយោជន៍អំពីវិធីសាស្ត្រការព្យាបាលដោយការកោសខ្យល់រួចមក តើបងប្អូនមានឆ្ងល់ដែរ ឬទេ ថា ការកោសខ្យល់នេះ តើមានផលប៉ះពាល់ដែរ ឬទេ?
លោកអ្នកបានដឹងហើយថា ការកោសខ្យល់ គឺមានការឈឺចាប់ និងធ្វើឲ្យស្បែកឡើងក្រហមជាំ ក្រតួលជាដើម ដោយការកកិតស្បែកជាមួយឧបករណ៍កោសខ្យល់ អាចបណ្តាលឲ្យមានផលប៉ះពាល់សរសៃឈាមតូចៗ ដែលគេស្គាល់ថាជា (capillaries) នៅខាងក្រោមស្បែក និងមានឡើងក្រហមឈាមបន្តិច ប៉ុន្តែសូមកុំបារម្ភ រយៈពេលពីរបីថ្ងៃ នឹងបាត់ទៅវិញ ប៉ុន្តែសូមជៀសវាងការប្រើប្រាស់វិធីសាស្ត្រកោសខ្យល់នេះ ប្រសិនបើអ្នកបានធ្វើការវះកាត់ណាមួយ ក្នុងរយៈពេលប្រាំមួយសប្តាហ៍ចុងក្រោយនេះ។
ប្រភព៖ Healthline https://www.healthline.com/health/gua-sha#benefits
រក្សាសិទ្ធិ©ដោយ៖ ពេទ្យយើង