មនុស្សចាស់ អាយុចាប់ពី ៥០ឆ្នាំ ទៅ ៨០ឆ្នាំ គួរវាស់សម្ពាធឈាមខ្លួនឯង ឱ្យបានទៀតទាត់ ២ដង ក្នុង ១ថ្ងៃ
សម្ពាធឈាមខ្ពស់ ឬជំងឺលើសឈាម គឺជាស្ថានភាពសុខភាពមួយ ដែលបានប៉ះពាល់មនុស្សរាប់លាននាក់។ វាអាចបង្កហានិភ័យ ឈានដល់ការគំរាមកំហែងអាយុជីវិត។ អ្នកវិទ្យាសាស្ត្រ រកឃើញថា មនុស្សចាស់មិនច្រើននោះទេ ដែលពិនិត្យសម្ពាធឈាមរបស់ខ្លួន នៅតាមផ្ទះទៀងទាត់។ ដូចនេះ មនុស្សចាស់ អាយុចាប់ពី ៥០ឆ្នាំ ទៅ ៨០ឆ្នាំ គួរវាស់សម្ពាធឈាម ឱ្យបានញឹកញាប់ ប្រមាណ ២ដង ក្នុង ១ថ្ងៃ។
CDC អាមេរិក រាយការណ៍ថា មនុស្សពេញវ័យប្រមាណតែ ២៤% ប៉ុណ្ណោះ ដែលគ្រប់គ្រងជំងឺលើសឈាមបានល្អ តាមរយៈការផ្លាស់ប្ដូររបបអាហារ ការហាត់ប្រាណ និងការទទួលទានថ្នាំព្យាបាលជំងឺលើសឈាម។ ការសិក្សាទៅលើមនុស្សចាស់ មានអាយុ ៥០ឆ្នាំ ទៅ ៨០ឆ្នាំ រកឃើញថា មានតែ ៤៨% (ទាបជាងពាក់កណ្ដាល) នៃក្រុមមនុស្សចាស់ទាំងនេះទេ ដែលវាស់ពិនិត្យសម្ពាធឈាម នៅតាមផ្ទះបានទៀងទាត់ល្អ។
ការវាស់ពិនិត្យសម្ពាធឈាម ដោយមានឧបករណ៍ផ្ទាល់ខ្លួននៅផ្ទះ គឺជារឿងសំខាន់ ដែលមានអត្ថប្រយោជន៍ច្រើន ដូចជា៖
១. វាជួយឱ្យអ្នកធ្វើរោគវិនិច្ឆ័យ ដឹងអំពីស្ថានភាពសម្ពាធឈាម មុនដំណាក់កាលធ្ងន់ធ្ងរ។ ម្យ៉ាងទៀត គេអាចរកឃើញថា មានជំងឺទឹកនោមផ្អែម ឬជំងឺតម្រងនោម ដែលជាកត្តាបង្កសម្ពាធឈាមខ្ពស់ផងដែរ។
២. វាជួយតាមដានស្ថានភាព នៃការព្យាបាលជំងឺលើសឈាម។
៣. វាជួយឱ្យអ្នកគ្រប់គ្រងសម្ពាធឈាម និងជំងឺលើសឈាមបានល្អ។
៤. វាជួយកាត់បន្ថយចំណាយលើការពិនិត្យ និងការព្យាបាលនៅមន្ទីរពេទ្យ។
ជាធម្មតា តើគួរពិនិត្យសម្ពាធឈាមញឹកញាប់ប៉ុណ្ណា?
អ្នកគួរពិនិត្យសម្ពាធឈាម ២ដង ក្នុង ១ថ្ងៃ៖
- លើកទីមួយ នៅពេលព្រឹក មុនពេលទទួលទានអាហារ ឬថ្នាំ
- លើកទីពីរ នៅពេលល្ងាច
ប្រភព៖ Medical News Today II https://www.medicalnewstoday.com/ & Mayo Clinic II https://www.mayoclinic.org/
រក្សាសិទ្ធិ©ដោយ៖ ពេទ្យយើង