វីរុស ៥ប្រភេទ ដែលអាចបង្កជំងឺរាតត្បាត នាពេលខាងមុខ

តិចនិក​សុខភាព និង ការរស់​នៅ​​ទូទៅ  |  Date: 2022-09-08

អ្នកវិទ្យាសាស្ត្រ កំពុងព្យាករ​អំពីលទ្ធភាពនៃជំងឺរាតត្បាត ដែលអាចនឹងកើតមាន ក្រោយយុគសម័យកូវីដ១៩។ ការទាយទុកមុន​នូវការវិវត្តជំងឺរាតត្បាត អាចជួយឱ្យសកលលោក ត្រៀមខ្លួនបានល្អជាងមុន ក្នុងការទប់ស្កាត់។ អ្នកជំនាញ មកពីសកលវិទ្យាល័យ ស៊ីដនី ក្នុងប្រទេសអូស្ត្រាលី បានផ្ដល់នូវការយល់ឃើញរបស់ខ្លួន ហើយក្នុងនោះ គេបានវិភាគលើ​វីរុសចំនួន ៥ប្រភេទ។ តើវីរុសអ្វីខ្លះ ដែលអាចក្លាយជាជំងឺរាតត្បាត សូមអានអត្ថបទលម្អិត ខាងក្រោម​។

 

វីរុស ដែលអាចបង្កជំងឺរាតត្បាត៖

១. Coronaviridae៖

• Coronaviridae គឺជាគ្រួសារវីរុស ដែលបានបង្កជំងឺធំៗជាច្រើន រួមមាន (១) កូវីដ១៩ (២) ជំងឺឆ្លងតាមផ្លូវដង្ហើមមជ្ឈិមបូពា៌ ឬ MERS និង (៣) ជំងឺផ្លូវដង្ហើមធ្ងន់ធ្ងរ ឬជំងឺ SARS។
• វាជាប្រភេទវីរុស ដែលអាចឆ្លងលើ​សត្វ និងមនុស្ស។
• រោគសញ្ញាទូទៅរបស់ជំងឺ ដែលបង្កដោយវីរុសប្រភេទនេះ ឃើញមានដូចជា (១) រោគសញ្ញាដូចជំងឺផ្ដាសាយ និង (២) រោគសញ្ញាជំងឺរលាកក្រពះពោះវៀន។

 

២. Flaviviridae៖

• Flaviviridae គឺជាគ្រួសារវីរុស ដែលបានបង្កជំងឺធ្ងន់ធ្ងរមួយចំនួន ដូចជា (១) ជំងឺគ្រុនឈាម (២) ជំងឺរលាកខួរក្បាលជប៉ុន ឬ Japanese encephalitis (៣) ជំងឺហ្ស៊ីកា និង (៤) ជំងឺគ្រុនក្ដៅ West Nile។
• ជាញឹកញាប់ ជំងឺទាំងនេះមិនបង្កហានិភ័យធ្ងន់ធ្ងរ ដល់ប៉ះពាល់អាយុជីវិតនោះទេ ប៉ុន្តែវាផ្ដល់នូវអាការៈ (១) ក្ដៅខ្លួន (២) ស្នាមកន្តួល ឬ (៣) ឈឺសន្លាក់។
• វីរុសហ្ស៊ីកា អាចបង្កពិការភាពពីកំណើត។
• ភ្នាក់ងារចម្លងវីរុសទាំងនេះ អាចជា (១) សត្វមូស (២) បក្សីទឹក (៣) ជ្រូក និង (៤) មនុស្ស។

 

៣. Orthomyxoviridae៖

• Orthomyxoviridae គឺជាគ្រួសារវីរុស ដែលបង្កជំងឺគ្រុនផ្ដាសាយ (Influenza)។
• ជំងឺគ្រុនផ្ដាសាយ បែងចែកចេញជាប្រភេទ A B និងប្រភេទកម្រ C និង D។
• ជំងឺនេះអាចឆ្លង ពីសត្វមកមនុស្ស។

 

៤. Paramyxoviridae៖

• Paramyxoviridae គឺជាគ្រួសាររបស់ (១) វីរុស Nipah និង (២) វីរុស Hendra។
• មនុស្ស ដែលងាយទទួលរង​ជំងឺបង្កដោយវីរុសប្រភេទទាំងនេះ គឺកុមារ​ ជាពិសេសគឺ​កុមារ ដែលខ្វះអាហារូបត្ថម្ភ។
• ជំងឺ ដែលបង្កឡើងដោយវីរុសទាំងនេះ មានដូចជា (១) ជំងឺកញ្ជ្រឹល (២) ជំងឺស្រឡទែន និង (៣) ជំងឺរលាកបំពង់ក លើក្មេងៗ។
• វីរុសថ្មី ដែលគេបានរកឃើញ ក្នុងប្រទេសចិន កាលពីថ្មីៗនេះ «វីរុស LangYa» ក៏ស្ថិតក្រោមអម្បូរវីរុសនេះដែរ។

 

៥. Togaviridae (alphaviruses)៖

• Togaviridae គឺជាអម្បូរវីរុស ដែលបង្កជំងឺ (១) គ្រុនឈីក (២) គ្រុនក្ដៅ Ross River (៣) ជំងឺរលាកស្រោមខួរភាគខាងកើត ឬ Eastern equine encephalitis (៤) ជំងឺរលាកស្រោមខួរភាគខាងលិច ឬ Western equine encephalitis (៥) និង (៦) ជំងឺរលាកស្រោមខួរ វ៉េណេស៊ុយអេឡា ឬ Venezuelan equine encephalitis។
• វីរុសនេះ បង្កដោយសត្វមូស ដែលភាគច្រើន មាននៅប្រទេស​​អូស្ត្រាលី៕

 

ប្រភព៖ The University of Sydney II https://www.sydney.edu.au/

រក្សាសិទ្ធិ©ដោយ៖ ពេទ្យយើង