វិធីព្យាបាលមហារីកថ្មី សម្រាប់ជំងឺមហារីក ដែលមានភាពធន់នឹង Immunotherapy

វិធីព្យាបាលដោយពង្រឹងប្រព័ន្ធភាពស៊ាំ (Immunotherapy) គឺជាវិធី ដែលប្រើប្រព័ន្ធភាពស៊ាំរបស់អ្នកជំងឺ សំដៅទៅរកកោសិកាមហារីក និងសម្លាប់កោសិកាមហារីកនោះ។ ជាពិសេស​ វាអាចជួយជីវិតអ្នកជំងឺមហារីក នៅពេលអ្នកជំងឺបរាជ័យក្នុងការព្យាបាលដោយ (១) ការវះកាត់ (២) កាំរស្មី ឬ (៣) ថ្នាំគីមី។ ទោះជាយ៉ាងណា វិធី Immunotherapy មិនអាចជួយអ្នកជំងឺទាំងអស់នោះទេ ព្រោះដុំសាច់ខ្លះ អាចវិវត្តខ្លួន ដែលអាចធន់នឹងការព្យាបាល ដោយប្រព័ន្ធភាពស៊ាំ។

ក្នុងពេលនេះ វេជ្ជបណ្ឌិតជំនាញផ្នែកជំងឺមហារីក ក្នុងប្រទេសអង់គ្លេស បានរកឃើញវិធីព្យាបាលថ្មី ដែលអាចវាយបកនឹងមហារីក ដែលធន់នឹង Immunotherapy។ បច្ចេកវិទ្យាថ្មី ដែលអ្នកវិទ្យាសាស្ត្របានប្រើ គឺមានឱសថ Immunotherapy លាយនឹងឱសថថ្មីម្យ៉ាង ឈ្មោះថា «Guadecitabine»។ Guadecitabine គឺជាឱសថសាកល្បង ដែលមាននាទីបង្វិល​សមត្ថភាពរបស់កោសិកាមហារីក ក្នុងការប្រឆាំងនឹងថ្នាំ Immunotherapy។ ក្នុងរបកគំហើញនេះ អ្នកជំងឺមហារីក ដែលត្រូវបានគេរំពឹងថា នឹងបាត់បង់ជីវិត ក្រោយសាកល្បង ការព្យាបាលគ្រប់វិធីសាស្រ្ត ត្រូវបានជួយសង្គ្រោះឱ្យរស់បានយូរជាងមុន។

ការផ្សំថ្នាំពង្រឹងភាពស៊ាំ ដូចជា ថ្នាំ Pembrolizumab ជាមួយនឹងថ្នាំ Guadecitabine បានបញ្ឈប់ការលូតលាស់មហារីក ក្នុងអ្នកជំងឺ ដែលបានចូលរួម ប្រមាណ ១ ភាគ ៣ នៅក្នុងវគ្គសាកល្បងទី​១។ អ្នកជំងឺ ដែលបានចូលរួម មាន​អ្នកជំងឺមហារីកសួត មហារីកសុដន់ មហារីកក្រពេញប្រូស្តាត និងមហារីកពោះវៀន។

អ្នកជំនាញផ្នែកសុខាភិបាល និងវេជ្ជបណ្ឌិតជាច្រើន បានបង្ហាញពីក្ដីសង្ឃឹមទៅលើវិធីថ្មីនេះ។ គេជឿថា នេះគឺជាការសាកល្បងវិធីព្យាបាលថ្មីៗ បន្ថែមទៅលើអ្វី ដែលមានបច្ចុប្បន្ន ហើយវាអាចមានប្រសិទ្ធភាពខ្ពស់ ក្នុងការព្យាបាលជំងឺមហារីកច្រើនប្រភេទ៕

ប្រភព៖ The Guardian II https://www.theguardian.com/international

រក្សាសិទ្ធិ©ដោយ៖ ពេទ្យយើង