អត្ថប្រយោជន៍ ៧យ៉ាង នៃបច្ចេកវិទ្យាឌីជីថល សម្រាប់សង្គមបច្ចុប្បន្ន
គ្រប់ចំណុចនៃជីវិតមនុស្ស បានជួបនូវបម្រែបម្រួល ទៅតាមបច្ចេកវិទ្យាឌីជីថល ក្នុងនោះ រួមមាន ការធ្វើដំណើរ ការងារ ការទិញឥវ៉ាន់ ប្រព័ន្ធកម្សាន្ត និងប្រព័ន្ធទំនាក់ទំនង។ល។ បច្ចេកវិទ្យាឌីជីថល បានផ្ដល់នូវភាពសម្បូរបែប ល្បឿនលឿនជាងមុន ទម្ងន់ស្រាលជាងមុន និងភាពបត់បែនជាងមុន សម្រាប់ឧបករណ៍អេឡិចត្រូនិច ឬការរស់នៅជាទូទៅ។ វាក៏បានក្លាយជាប្រភពដ៏ទូលំទូលាយ សម្រាប់រក្សាព័ត៌មាន ឯកសារ និងចំណេះដឹង ដែលយើងអាចស្វែងរក និងដាក់តាមខ្លួនបានគ្រប់ពេលវេលា និងគ្រប់ទីកន្លែង។
ទាំងនេះ ជាអត្ថប្រយោជន៍ពិសេសៗ នៃបច្ចេកវិទ្យាឌីជីថល៖
១. ទំនាក់ទំនងសង្គម៖
បច្ចេកវិទ្យាឌីជីថល បង្កើតភាពងាយស្រួល សម្រាប់ការទាក់ទងមិត្តភក្ដិ គ្រួសារ និងបំពេញការងារបានពីចម្ងាយ។ មនុស្សអាចផ្សារភ្ជាប់ទំនាក់ទំនង ពីតំបន់មួយ ទៅតំបន់មួយ នៅលើប្រព័ន្ធសង្គម សារសម្លេង វីដេអូ ឬរូបភាព។ល។
២. ល្បឿននៃការធ្វើទំនាក់ទំនង៖
ល្បឿនអ៊ិនធើណែត បានពង្រីកសក្ដានុពលខ្លាំងជាងមុន ដែលជំរុញឱ្យប្រព័ន្ធផ្សព្វផ្សាយ ចែករំលែកព័ត៌មាន បានរហ័ស និងមានប្រសិទ្ធភាពជាងមុន។
៣. ការងារ ដែលមានភាពបត់បែន៖
របៀបធ្វើការងារ ក៏បានប្រែប្រួល ទៅតាមវត្តមានរបស់បច្ចេកវិទ្យាឌីជីថល ផងដែរ។ ប្រព័ន្ធទំនាក់ទំនងល្អជាងមុន ជួយឱ្យមនុស្សអាចធ្វើការបានដោយងាយស្រួល ពោរពេញដោយភាពបត់បែន មិនថា ឧបសគ្គអ្វីនោះទេ។
៤. ឱកាសក្រេបចំណេះដឹង៖
ប្រសិនបើអ្នកអាចភ្ជាប់ ទៅនឹងប្រព័ន្ធអ៊ិនធើណែត អ្នកអាចចូលទៅរកប្រភពចំណេះដឹង ដ៏ធំមហិមា និងចម្រុះនៅក្នុងបណ្ដាគេហទំព័រ។ អ្នកអាចចូលរួមថ្នាក់រៀន និងរៀនសូត្រវិជ្ជាថ្មីៗ លើសេវាអនឡាញ ដោយងាយស្រួលបំផុត។ ម្យ៉ាងទៀត វិធីសិក្សាទាំងនេះ ក៏ល្អសម្រាប់ជនពិការផងដែរ។
៥. ស្វ័យប្រវត្តិកម្ម៖
ជាមួយបច្ចេកឌីជីថល ម៉ាស៊ីនកាន់តែមានភាពវៃឆ្លាតជាងមុន។ ដំណើរការផ្សេងៗ របស់ម៉ាស៊ីន ឬឧបករណ៍អេឡិចត្រូនិច អាចធ្វើទៅបាន ដោយស្វ័យប្រវត្តិ មិនតម្រូវឱ្យមនុស្សគ្រប់គ្រងផ្ទាល់ នោះឡើយ។
៦. ស្តុករក្សាព័ត៌មាន៖
ព័ត៌មានជាច្រើនរបស់អ្នក ដែលអាចជារូបភាព ចម្រៀង វីដេអូ ទិន្នន័យបណ្ដាញទំនាក់ទំនង ឬឯកសារផ្សេងៗ អាចស្ថិតក្នុងដៃអ្នក តាមរយៈការរក្សាទុកក្នុងឧបករណ៍អេឡិចត្រូនិច។
៧. ការគ្រប់គ្រង និងកែប្រែ៖
អ្វីដែលពិសេសមួយទៀត អំពីប្រព័ន្ធឌីជីថល គឺមនុស្សអាចគ្រប់គ្រង និងកែប្រែទិន្នន័យ ព័ត៌មានផ្សេងៗបាន។ ទិន្នន័យទាំងអស់ ដែលដំណើរការលើប្រព័ន្ធឌីជីថល សុទ្ធតែអាចគ្រប់គ្រងបាន និងកែប្រែបាន។ ឧទាហរណ៍ អ្នកអាចកែអត្ថបទ លុប ឬបន្ថែមពាក្យ ឬរូបភាពបាន។ គ្រប់យ៉ាង ស្ថិតក្នុងការគ្រប់គ្រងរបស់អ្នក៕
ប្រភព៖ Blog.Universal Business School II https://blog.universalbusinessschool.com/
រក្សាសិទ្ធិ©ដោយ៖ ពេទ្យយើង