អ្នកម្តាយ ត្រូវលះបង់ទម្លាប់ ឱ្យកូនតូចៗ លេងហ្គេម ឬមើលកត្តុតាតាមទូរស័ព្ទ អាយផេត និងទូរទស្សន៍
បញ្ហាភ្នែកម៉្ញូប អាចកើតឡើងលើកុមារគ្រប់វ័យ ហើយបង្កឡើងដោយកត្តាជាច្រើន មានកត្តាពីកំណើត កត្តាតំណពូជ និងជាពិសេសការមើលជិតរយៈពេលយូរ ដូចជា ការអានសៀវភៅ ការមើលអេក្រង់កុំព្យួទ័រ មើលទូរទស្សន៍ ឬមើលទូរស័ព្ទច្រើន ជាដើម។ ក្នុងនោះ ទម្លាប់ឱ្យកុមារ លេងហ្គេមតាមទូរស័ព្ទ ឬមើលកត្តុតាតាមទូរស័ព្ទ មើលអាយផេត និងមើលទូរទស្សន៍ ដើម្បីឱ្យកូននៅស្ងៀម ជាទម្លាប់មិនល្អ ដែលអាចឱ្យកុមារ ឈានទៅម៉្ញូបភ្នែក។
វេជ្ជបណ្ឌិតឯកទេស សូរ សុបញ្ញាវតី អនុប្រធានផ្នែកវះកាត់ត្របកភ្នែក និងជំងឺភ្នែកកុមារ ធ្វើការនៅមន្ទីរពេទ្យភ្នែកជប៉ុន បានប្រាប់កម្មវិធីពេទ្យយើង ពីវិធីការពារភ្នែកម៉្ញូបសម្រាប់កុមារ តាមរយៈកាត់បន្ថយការមើលជិតយូរ និងច្រើនពេក ដូចជា លេងហ្គេម ឬក៏មើលកត្តុតា តាមទូរសព្ទ ឬកុំព្យួទ័រ ឬក៏មើលទូរទស្សន៍ ឬតាមម៉ាស៊ីនឌីជីថល ជាដើម។
វេជ្ជបណ្ឌិតឯកទេស សូរ សុបញ្ញាវតី ក៏បានណែនាំដល់អ្នកម្តាយ ឱ្យលះបង់ទម្លាប់ ដែលឱ្យកូនតូចៗ លេងហ្គេម ឬក៏មើលកត្តុតាតាមទូរស័ព្ទ ឬមើលទូរទស្សន៍ ដើម្បីឱ្យអ្នកម្តាយ មានពេលទៅធ្វើការងារផ្សេងៗ គឺត្រូវតែឈប់ធ្វើដូច្នេះ ព្រោះអាចនឹងឱ្យកូនវិវត្តទៅរកភ្នែកម៉្ញូប។
ចំពោះកុមារ ដែលត្រូវរៀនច្រើនតាមទូរស័ព្ទ កុំព្យួទ័រ ទូរទស្សន៍ ឬក៏អានសៀវភៅច្រើន ក៏ត្រូវបានវេជ្ជបណ្ឌិតឯកទេស សូរ សុបញ្ញាវតី ណែនាំថា កុមារនោះ ត្រូវសម្រាកឱ្យបានច្រើន ក្នុងរយៈពេល ១ម៉ោង ទៅ ២ម៉ោង សម្រាកម្តង ៥នាទី ទៅ ១០នាទី ដោយការបិទភ្នែក ឬការសំឡឹងមើលវត្ថុឆ្ងាយ លើសពី ៦ម៉ែត្រឡើងទៅ ឬក៏កុមារនោះ អាចដើរយកខ្យល់អាកាស នៅខាងក្រៅផ្ទះមួយសន្ទុះ ហើយបន្ទាប់មក កុមារអាចវិលមករកការសិក្សាវិញបាន។
មួយវិញទៀត វេជ្ជបណ្ឌិតឯកទេស សូរ សុបញ្ញាវតី ក៏បានណែនាំថា ការផ្លាស់ប្តូរឥរិយាបថក្នុងការអង្គុយ និងការអានសៀវភៅ ឬមើលអេក្រង់ទូរស័ព្ទ កុំព្យួទ័រ ឬទូរទស្សន៍ ក៏មានសារសំខាន់សម្រាប់ភ្នែកកុមារដែរ។ នោះគឺការអង្គុយមិនត្រង់ខ្លួន ហើយចូលចិត្តមើលជិតៗពេក ក៏អាចប៉ះពាល់ដល់ភ្នែករបស់កុមារ ធ្វើឱ្យឆាប់ម៉្ញូបផងដែរ។
ចំពោះវិធីព្យាបាលភ្នែកម៉្ញូបរបស់កុមារ ត្រូវបានវេជ្ជបណ្ឌិតឯកទេស សូរ សុបញ្ញាវតី លើកឡើងថា បច្ចុប្បន្ន ពុំទាន់មានវិទ្យាសាស្ត្រណា អាចព្យាបាលភ្នែកម៉្ញូបរបស់កុមារ បានជាសះស្បើយ ១០០%នោះទេ។ ប៉ុន្តែយើងមានដំណោះស្រាយ និងវិធីជាច្រើន ដែលអាចពន្យារនៃការវិវត្តភ្នែកម៉្ញូបរបស់កុមារ ដូចជា ការប្រើប្រាស់វ៉ែនតា ដើម្បីសម្រួលដល់ការប្រឹងមើល។ គេក៏អាចប្រើ Soft Contact Lens ដែលមានដឺក្រេស្រាល។ ក្នុងនោះ ក៏គេអាចប្រើប្រាស់ថ្នាំបន្ទក់ភ្នែក ប្រើ Contact Lens ORTHO-K ហើយក៏អាចប្រើការវះកាត់ភ្នែក ដោយប្រើកាំរស្មី ឡាស៊ែ។ តែការព្យាបាលដោយវះកាត់នេះ គេត្រូវរង់ចាំរហូតដល់កុមារពេញវ័យ ទើបអាចធ្វើបាន។
វេជ្ជបណ្ឌិតឯកទេស សូរ សុបញ្ញាវតី បានណែនាំដល់ឪពុកម្តាយ និងអាណាព្យាបាលថា បើសិនជាកូនៗ មានបញ្ហាភ្នែកម៉្ញូប គួរតែនាំទៅពិនិត្យ និងព្យាបាលនៅកន្លែងឯកទេស ឱ្យបានត្រឹមត្រូវ ហើយការប្រើប្រាស់វ៉ែនតា សម្រាប់ភ្នែកម៉្ញូប ជាជម្រើសដ៏ល្អមួយ ដើម្បីឱ្យកុមារ អាចមើលឃើញច្បាស់ល្អឡើងវិញ។ ការប្រើប្រាស់វ៉ែនតាម៉្ញូប មិនមែនធ្វើឱ្យកុមារឡើងដឺក្រេភ្នែកម៉្ញូបនោះទេ។
សូមបញ្ជាក់ថា មន្ទីរពេទ្យភ្នែកជប៉ុន ជាមន្ទីរពេទ្យឯកជន នៅក្នុងរាជធានីភ្នំពេញ បានប្រើប្រាស់នូវកម្មវិធីពេទ្យយើង។ កម្មវិធីពេទ្យយើង បង្កើតដោយក្រុមហ៊ុន ហ្វឺស វីម៉ិនថេក អេស៊ា ជាប្រព័ន្ធគ្រប់គ្រងមន្ទីរពេទ្យឌីជីថលដំបូងគេនៅកម្ពុជា ដើម្បីចូលរួមចំណែកកសាងប្រព័ន្ធសុខាភិបាលទំនើប បែបឌីជីថល នៅកម្ពុជា និងសម្រាប់សហគមន៍អាស៊ាន តាមរយៈការផ្តល់សុវត្ថិភាពដល់កំណត់ត្រាព្យាបាល ទិន្នន័យសុខភាពអ្នកជំងឺ និងជួយឲ្យគ្លីនិក និងមន្ទីរពេទ្យដៃគូដំណើរការរលូន និងពុំមានការរំខាន៕