ភេសជ្ជៈនេះ សំខាន់ សម្រាប់សុខភាព ប៉ុន្តែអាចទាក់ទងនឹងមហារីកក្រពេញប្រូស្តាត

ជំងឺមហារីក្រពេញប្រូស្តាត គឺជាជំងឺកើតឡើងលើមនុស្សប្រុសជាច្រើន ហើយមានហានិភ័យមរណភាពខ្ពស់ សម្រាប់អ្នកជំងឺដែលត្រូវប្រឈម។ ការស្រាវជ្រាវ បានរកឃើញថា កត្តាប្រឈមរបស់ជំងឺមហារីកក្រពេញប្រូស្តាត មានដូចជា អាយុ (ចាប់ពី ៦៥ឆ្នាំឡើងទៅ) និងការលើសទម្ងន់។ល។ សកលវិទ្យាល័យ Loma Linda ទើបរកឃើញថា អាហារមួយប្រភេទនេះ អាចទាក់ទងនឹងជំងឺមហារីកក្រពេញប្រូស្តាត នោះគឺ ទឹកដោះគោ។

ទឹកដោះគោ គឺជាអាហារទ្រទ្រង់ជីវិតដ៏សំខាន់ សម្រាប់រាងកាយមនុស្ស។ រាងកាយមនុស្ស ត្រូវការ​វីតាមីន ជាតិរ៉ែ​ច្រើន​ប្រភេទ និងប្រូតេអ៊ីន ដែលសម្បូរបែប នៅក្នុងទឹកដោះគោ។ ក៏ប៉ុន្តែ​បើទទួលទានច្រើន ក៏មិនល្អដែរ ព្រោះការសិក្សាថ្មីមួយ បានរកឃើញថា ទឹកដោះគោ អាចមានទំនាក់ទំនង នឹងហានិភ័យខ្ពស់ក្នុងការវិវត្ត​ជំងឺមហារីកក្រពេញប្រូស្តាត។

​​ការស្រាវជ្រាវ​នេះបានបញ្ជាក់ថា បុរសដែលទទួលទានទឹកដោះគោ បរិមាណ ៤៣០ក្រាម (១.៧៥កែវ) ក្នុង ១ថ្ងៃ ប្រឈមនឹងហានិភ័យមហារីកក្រពេញប្រូស្តាត ២៥% ខ្ពស់ជាងបុរស ដែលទទួលទាន​ក្នុងបរិមាណតិច។ គួរបញ្ជាក់ថា កាល់ស្យូម ត្រូវបានគេរកឃើញថា មានទំនាក់ទំនង​នឹងជំងឺមហារីក​មួយប្រភេទនេះ កន្លងមក។

ទោះជាយ៉ាងណា ការសិក្សានេះ មិនបានបញ្ជាក់ថា ទឹកដោះគោ គឺ​​ជា​​​មូល​​ហេតុ​​​បង្ក​​ជំងឺមហារីកក្រពេញប្រូស្តាតនោះទេ។ អ្វីដែលត្រូវបានលើកឡើង គឺ​ការទទួលទាន​ទឹកដោះគោ មានទំនាក់ទំនងនឹង​ការកើនឡើង​នូវ​ហានិ​ភ័យ ជំងឺមហារីកក្រពេញប្រូស្តាត។ ដូចនេះ ទំនាក់ទំនងនេះ គួរមានការសិក្សាបន្តនៅពេលខាងមុខ។ កាន់តែពិសេសនោះ គឺ​បុរសដែលគ្រួសារមានប្រវត្តិ ជំងឺមហារីកក្រពេញប្រូស្តាត គួរពិចារណាអំពីបរិមាណទឹកដោះគោ ដែលខ្លួនទទួលទានប្រចាំថ្ងៃ៕

ប្រភព៖ Eat This Not That II https://www.eatthis.com/ & Fox6 Milwaukee II https://www.fox6now.com/

រក្សាសិទ្ធិ©ដោយ៖ ពេទ្យយើង