អត្ថប្រយោជន៍សុខភាពសម្បូរបែបរបស់ផ្លែទៀប
ផ្លែទៀប ជាផ្លែឈើមួយប្រភេទ ដែលពេញនិយម សម្រាប់ប្រជាជនកម្ពុជា ព្រោះរសជាតិដ៏ឆ្ងាញ់របស់វា។ អ្វីដែលកាន់តែពិសេសនោះ គឺអ្នកទទួលទានផ្លែទៀប អាចទទួលបានអត្ថប្រយោជន៍ជាច្រើន។ ផ្លែទៀបសម្បូរនូវជាតិសរសៃវីតាមីនច្រើនប្រភេទ ជាតិរ៉ែ និងផ្ដល់ការគាំទ្រដល់ប្រព័ន្ធភាពស៊ាំ បញ្ហារលាក សុខភាពភ្នែក និងសុខភាពបេះដូង។
ទាំងនេះ ជាអត្ថប្រយោជន៍សុខភាព ទាំង ៨ របស់ផ្លែទៀប៖
១. សម្បូរសារធាតុប្រឆាំងអុកស៊ីតកម្ម
ក្នុងផ្លែទៀប មានអាស៊ីត Kaurenoic សារធាតុ Flavonoids សារធាតុ Carotenoids និងវីតាមីន C ដែលមានប្រសិទ្ធភាពខ្ពស់ប្រឆាំងអុកស៊ីតកម្ម។
២. ជួយលើកអារម្មណ៍
វីតាមីន B6 ជាច្រើន ក្នុងផ្លែទៀប មាននាទីសំខាន់ ក្នុងការបង្កើតភ្នាក់ងារបញ្ជូនសារ ក្នុងប្រព័ន្ធប្រសាទ រួមមាន សេរេតូនីន និងដូប៉ាមីន។ សមាសធាតុទាំងនេះ ជួយឱ្យអារម្មណ៍ដំណើរការបានល្អ។
៣. ជួយដល់សុខភាពភ្នែក
ផ្លែទៀប មានផ្ទុកសារធាតុប្រឆាំងអុកស៊ីតកម្ម Lutein ដែលជួយដល់គំហើញរបស់ភ្នែក ដោយប្រឆាំងនឹងរ៉ាឌីកាល់សេរី។
៤. បង្ការការឡើងសម្ពាធឈាម
វាសម្បូរនូវសារធាតុចិញ្ចឹម រួមមាន ប៉ូតាស្យូម និងម៉ាញ៉េស្យូមផងដែរ ដែលជួយឲឈាមដើរបានល្អ។ សារធាតុទាំងនេះ ជួយបន្ទាបសម្ពាធឈាម និងកាត់បន្ថយហានិភ័យជំងឺបេះដូង និងជំងឺដាច់សរសៃឈាម។
៥. បង្កើនមុខងាររំលាយអាហារ
ជាតិសរសៃក្នុងផ្លែទៀប ជួយឱ្យកាកសំណល់ដំណើរការបានល្អ ហើយវាក៏អាចចិញ្ចឹមបាក់តេរីល្អៗ ដែលមាននៅក្នុងពោះវៀន។ នោះនាំឱ្យពោះវៀន មានចលនាល្អ និងប្រព័ន្ធរំលាយអាហារមានសុខភាពល្អ។
៦. ផ្ទុកនូវសារធាតុប្រឆាំងជំងឺមហារីក
សារធាតុ Flavonoids ក្នុងផ្លែទៀប រួមមាន catechin epicatechin និង epigallocatechin ត្រូវបានគាំទ្រដោយការសិក្សាថា មានសមត្ថភាពប្រឆាំងការលូតលាស់កោសិកាមហារីក។
៧. ប្រឆាំងបញ្ហារលាក
ផ្លែទៀប មានផ្ទុកអាស៊ីត Kaurenoic ដែលប្រឆាំងបញ្ហារលាកច្រើនប្រភេទ ក៏ដូចជា ជួយទប់ស្កាត់ជំងឺបេះដូង និងជំងឺមហារីក។
៨. ជួយគាំទ្រប្រព័ន្ធភាពស៊ាំ
វីតាមីន C នៅក្នុងផ្លែទៀប ជាបង្គោលនៃការគាំទ្រប្រព័ន្ធស៊ាំ និងជួយរាងកាយប្រឆាំងមេរោគឆ្លង និងជំងឺផ្សេងៗ៕
ប្រភព៖ Healthline II https://www.healthline.com/
រក្សាសិទ្ធិ©ដោយ៖ ពេទ្យយើង