តើមួយថ្ងៃ ត្រូវគេងប៉ុន្មានម៉ោង ទើបល្អដល់សុខភាព?
ការស្រាវជ្រាវរបស់អ្នកវិទ្យាសាស្ត្រ បង្ហាញថា ពេលវេលាដំណេក ចាំបាច់បំផុត មិនថា កុមារ ឬមនុស្សពេញវ័យ និងមនុស្សចាស់នោះទេ។ ទារក ដែលទើបនឹងកើត ដល់អាយុ ២ឆ្នាំ គេងជាមធ្យមពី ១២ ទៅ ១៤ ម៉ោង ក្នុងមួយថ្ងៃ។ ចំពោះកុមារអាយុ ៤ ឆ្នាំ ត្រូវការពេល ១១ ម៉ោង ដើម្បីគេង ហើយកុមារអាយុ ១០ ឆ្នាំ គឺ ១០ ម៉ោង។ ចាប់ពីពេញវ័យឡើងទៅ ដំណេកជាយ៉ាងតិចបំផុត ៧ម៉ោង ក្នុងមួយថ្ងៃ។
ក្រុមអ្នកស្រាវជ្រាវ បានព្រមានអំពីបញ្ហាទាំងឡាយនៃការប្រព្រឹត្តិរបស់កុមារ ឬការប្រឈមកើតជំងឺសរសៃឈាមបេះដូង ប្រសិនបើកុមារ គេងមិនគ្រប់គ្រាន់។ ដូច្នេះអាណាព្យាបាល ឬមាតាបិតា គួររឹតបន្តឹងទៅលើការកំណត់ពេលវេលានៃការគេងរបស់កូន ព្រមទាំងព្យាយាមហ្វឹកហាត់ ឲ្យពួកគេ ចូលគេងតាមពេលវេលាឲ្យបានទៀងទាត់។
ការស្រាវជ្រាវ បានបង្ហាញពីការគេងគ្រប់គ្រាន់ ទៅតាមក្រុមអាយុ ដូចខាងក្រោម៖
១-ទារកទើបនឹងកើតដល់បីខែ៖ គេងឲ្យបាន ១៤-១៧ម៉ោង
២-ទារកចាប់ពី ៤-១១ខែ៖ គេងឲ្យបាន ១២-១៥ម៉ោង
៣-ក្មេងអាយុចាប់ពី ១-២ឆ្នាំ៖ គេងឲ្យបាន ១១-១៤ម៉ោង
៤-ក្មេងអាយុចាប់ពី ៣-៥ឆ្នាំ៖ គេងឲ្យបាន ១០-១៣ម៉ោង
៥-ក្មេងអាយុចាប់ពី ៦-១៣ឆ្នាំ៖ គេងឲ្យបាន ៩-១១ម៉ោង
៦-ក្មេងអាយុចាប់ពី ១៤-១៧ឆ្នាំ៖ គេងឲ្យបាន ៨-១០ម៉ោង
៧-មនុស្សពេញវ័យ ចាប់ពី ១៨-៦៤ឆ្នាំ៖ គេងឲ្យបាន ៧-៩ម៉ោង
៨-អាយុចាប់ពី ៦៥ឆ្នាំឡើងទៅ៖ គេងឲ្យបាន៧-៨ម៉ោង
ផលអាក្រក់ ដែលកុមារគេងតិច មិនគ្រប់ម៉ោង អាចធ្វើឲ្យពួកគេ ជួបនឹងបញ្ហាខាងផ្នែកអារម្មណ៍ ដូចជា ឆាប់ក្រេវក្រាធ ឆាប់កើតទុក្ខ និងមានបញ្ហាភ័យខ្លាច។
.សារៈប្រយោជន៍នៃការគេងគ្រប់គ្រាន់៖
ការគេងមិនត្រឹមតែឲ្យរាងកាយ និងខួរក្បាល បានសម្រាកទេ តាមពិតទៅ នៅពេលយើងគេងលក់ រាងកាយរបស់យើង រឹតតែខ្លាំង ក្នុងការជួយសាច់ដុំ ដែលធ្វើការច្រើន នៅពេលថ្ងៃ និងកម្ចាត់នូវអ្វីដែលមិនល្អដែលខួរក្បាលបានបង្កើត។
.ផលប៉ះពាល់នៃការគេងមិនគ្រប់គ្រាន់៖
ការគេងមិនគ្រប់គ្រាន់ មិនត្រឹមតែធ្វើឲ្យយើងហត់ទេ វាក៏មានផលប៉ះពាល់ផ្សេងទៀត ចំពោះសុខភាព។ ការគេងមិនគ្រប់គ្រាន់ អាចធ្វើឲ្យយើង មិនអាចធ្វើការសម្រេចចិត្តបានល្អ ខ្វះនូវគំនិតច្នៃប្រឌិត និងពិបាកក្នុងការធ្វើការ។ មិនត្រឹមតែប៉ុណ្ណោះ ក៏អាចបណ្តាលឲ្យមានជំងឺរ៉ាំរ៉ៃផ្សេងៗ ដូចជា ជំងឺធាត់ ជំងឺបេះដូង ជំងឺទឹកនោមផ្អែម និងជំងឺភ្លេចភ្លាំង (Alzheimer’s) ជាដើម៕
រក្សាសិទ្ធិ©ដោយ៖ ពេទ្យយើង