ទម្លាប់ ៥យ៉ាង អាចធ្វើឱ្យអ្នកឡើងគីឡូ
ការទទួលទានអាហារសម្បូរជាតិខ្លាញ់ និងជាតិផ្អែម ហើយមិនបានហាត់ប្រាណទៀងទាត់ សុទ្ធតែជាកត្តាធ្វើឱ្យអ្នកឡើងទម្ងន់។ ក្រៅពីនោះ ក៏មានទម្លាប់ ៥យ៉ាងទៀត ដែលធ្វើឱ្យអ្នកធាត់ ឡើងគីឡូផងដែរ។
ទម្លាប់ ៥យ៉ាង ដែលធ្វើឱ្យអ្នកឡើងទម្ងន់ រួមមាន៖
១. គេងច្រើនពេក៖
ការសិក្សាស្រាវជ្រាវថ្មីមួយ បង្ហាញថា ការគេងលើសពី ១០ម៉ោង ក្នុងមួយយប់ អាចបណ្ដាលឱ្យសន្ទស្សន៍ម៉ាសរាងកាយឡើងខ្ពស់ គួរឱ្យកត់សម្គាល់។ ដូច្នេះហើយទើបអ្នកជំនាញផ្នែកសុខភាព ណែនាំឱ្យគេងត្រឹមពី ៧ ទៅ ៩ ម៉ោង ក្នុង ១យប់ៗ។
២. ត្រូវពន្លឺព្រះអាទិត្យពេលព្រឹក៖
បើក្រោកពីគេង មិនបានត្រូវពន្លឺព្រះអាទិត្យ ក៏ជាកត្តាមួយ អាចនាំឱ្យធាត់ ឡើងទម្ងន់ផងដែរ។ អ្នកជំនាញ ពន្យល់ថា រលកពន្លឺពណ៌ខៀវនៃព្រះអាទិត្យពេលព្រឹកព្រលឹម ជួយបង្កើនការរំលាយអាហារ និងដាស់រាងកាយឱ្យភ្ញាក់ស្វាង។ ដូច្នេះអ្នកត្រូវស្រូបពន្លឺព្រះអាទិត្យពេលព្រឹក ត្រឹមរយៈពេលពី ២០នាទី ទៅ ៣០នាទី នៃពន្លឺថ្ងៃ គឺគ្រប់គ្រាន់ហើយ ក្នុងការផ្ដល់ឥទ្ធិពលលើសន្ទស្សន៍ម៉ាសរាងកាយ។
៣. រៀបចំកន្លែងគេង៖
ការសិក្សាស្រាវជ្រាវ ដោយអ្នកជំនាញខាងផ្នែកដំណេករបស់សហរដ្ឋអាមេរិក បង្ហាញថា អ្នកដែលរៀបចំកន្លែងគេងស្អាតត្រឹមត្រូវ អាចគេងលក់បានស្កប់ពេញលេញ។ ការគេងបានស្កប់គ្រប់គ្រាន់ គឺជាមធ្យោបាយដ៏ប្រសើរបំផុត ដើម្បីឆ្ពោះទៅរកសុខភាពល្អ។
៤. ភ្លេចថ្លឹងទម្ងន់ខ្លួនឯង៖
ការថ្លឹងទម្ងន់ជាប្រចាំ គឺជាតិចនិកដ៏ប្រសើរ ដែលជួយលើកទឹកចិត្ត ឬជំរុញដល់ការសម្រកទម្ងន់។ ពេលវេលាដ៏ល្អបំផុតមួយ ដើម្បីថ្លឹងទម្ងន់នោះ គឺពេលព្រឹក មុនពេលអ្នកទទួលទានអាហារ ឬភេសជ្ជៈអ្វី។ នោះក៏ព្រោះតែអ្នកបាត់បង់ទម្ងន់នៃជាតិទឹកពេញមួយយប់។ ដូច្នេះអ្នកនឹងទទួលបានទម្ងន់ត្រឹមត្រូវបំផុត ប្រសិនបើថ្លឹងនៅពេលព្រឹក។
៥. ទទួលទានអាហារពេលព្រឹក៖
ក្រុមអ្នកស្រាវជ្រាវ បានបង្ហាញថា អ្នកគួរតែទទួលទានអាហារពេលព្រឹកឆ្ងាញ់ៗ ឱ្យបានច្រើនគ្រប់គ្រាន់។ អាហារពេលព្រឹក ដែលមានតុល្យភាព គឺមានផ្ទុក ៦០០ កាឡូរីនៃជាតិប្រូតេអ៊ីន, កាបូអ៊ីដ្រាត និងបង្អែមខ្លះ ដែលនឹងធ្វើឱ្យងាយស្រួល ក្នុងការតាមដាន ឬអនុវត្តន៍តាមផែនការនៃរបបអាហារប្រចាំថ្ងៃ។ ការមិនទទួលទានអាហារពេលព្រឹក ឬទទួលទានតិចពេក នាំឱ្យអ្នកត្រូវទទួលទានអាហារពេលថ្ងៃត្រង់ច្រើន ដែលជាហេតុនាំឱ្យឡើងគីឡូផងដែរ។
កត្តាទាក់ទងនឹងជំងឺធាត់៖
មានកត្តាជាច្រើន ជះឥទ្ធិពលបង្កឲ្យកើតជំងឺធាត់ ដូចជា៖ ហ្សែន របបអាហារ មិនបញ្ចេញសកម្មភាពរាងកាយ បញ្ហាផ្លូវអារម្មណ៍ និងកត្តាវេជ្ជសាស្ត្រ ជាដើម។
អ្នកជំនាញសុខភាព បានលើកតឡើងពីមានមូលហេតុខុសៗគ្នាជាច្រើន នាំឲ្យកើតជំងឺធាត់។ ការស្រាវជ្រាវមួយចំនួន រកឃើញអត្តសញ្ញាណជំងឺធាត់ មាន ៦ប្រភេទ រួមមាន៖
១– ជំងឺធាត់ដោយមិនបញ្ចេញសកម្មភាពរាងកាយ៖
ផ្នែកផ្សេងៗនៃរាងកាយធ្លាប់មានកម្លាំងរឹងមាំពីមុនមក បែរជាទទួលបានជាតិខ្លាញ់យ៉ាងឆាប់រហ័ស និងធ្វើឲ្យសុខភាពមិនល្អ។
២– ធាត់ដោយសារអាហារ៖
បើយើងចូលចិត្តញ៉ាំអាហារមិនល្អ ដូចជា Fast Food អាហារវេចខ្ចប់ជាដើមនោះ ងាយនឹងមានហានិភ័យខ្ពស់ កើតជំងឺធាត់មិនខាន។
៣– ធាត់ដោយសារបញ្ហាផ្លូវចិត្ត៖
ជំងឺធាត់ប្រភេទនេះ មានទំនាក់ទំនងទៅនឹងកម្រិតភាពតានតឹង ឬបាក់ទឹកចិត្ត យើងកំពុងកើតមាន។ ដើម្បីទប់ស្កាត់ជំងឺនេះ យើងត្រូវចេះគ្រប់គ្រងអារម្មណ៍ឲ្យបានល្អ។
៤– ធាត់ដោយជាតិគ្លុយទីន (ប្រូតេអ៊ីន)៖
ជំងឺធាត់ប្រភេទនេះ ជាធម្មតា កើតមានលើស្រីៗ អំឡុងពេលផ្លាស់ប្ដូរអ័រម៉ូនរដូវ ដូចជា ពេលឈានចូលពេញវ័យ មានផ្ទៃពោះ និងដល់អាយុអស់រដូវ ជាដើម។
៥– ធាត់ដោយសារសរសៃឈាមខ្មៅ៖
ចរន្តឈាម ជាមូលហេតុមួយ បណ្ដាលឲ្យធាត់ដូចគ្នា។ វាជាហ្សែនធម្មជាតិ មិនមែនជាទម្លាប់នោះទេ។ ជាធម្មតា កើតមានចំពោះស្រីៗ កំពុងមានផ្ទៃពោះ។
៦– ធាត់ដោយសារបំពង់អាកទែឡើងក្រាស់ (Atherogenic)៖
ជាស្ថានភាពដ៏គ្រោះថ្នាក់មួយ ទាក់ទងទៅនឹងការផឹកស្រវឹង អាចប៉ះពាល់ដល់សរីរាង្គផ្សេងទៀត និងនាំឲ្យមានបញ្ហាផ្លូវដង្ហើម។
ជំងឺធាត់ មានគ្រោះថ្នាក់ណាស់ ព្រោះវានាំឲ្យមានផលប៉ះពាល់អវិជ្ជមានមួយចំនួន លើរាងកាយ។ អ្នកធាត់ៗ គួរកែប្រែ មករកទម្លាប់រស់នៅ ដែលមានសុខភាពល្អ និងពិគ្រោះជាមួយគ្រូពេទ្យ ដើម្បីទទួលបានដំបូន្មាន និងការព្យាបាលត្រឹមត្រូវ៕
រក្សាសិទ្ធិ©ដោយ៖ ពេទ្យយើង